Hmun hnihah heroin an man

Central YMA hnuaia ruihhlo do tura din Central Anti Drugs Squad (CADS) chuan nizan (4.2.2026) khan Aizawl khawpui chhung hmun hnihah heroin hawng 30 an man.

CYMA tarlan danin, an hnu chhuilai bawhzuiin CADS-te chuan nizan khan Aizawlah hmun hnihah ruihhlo dapchhuah hna an thawk a ni. He an beihpui thlaknaah hian heroin hawng 18 leh hawng 12, a vaiin hawng 30 an man chhuak a ni.

Heroin hi a awm ngei a ni tih finfiahna an neih hnuah khawihche loin Excise & Narcotics Department hnuaia Anti Narcotic Squad (ANS) te kutah dan anga hma la chhunzawm turin an hlan nghal a ni.

YMA-in kumpuan atan, ‘Ruihhlo Do’ a hman hnu hian, CADS-te chuan an hmalakna hi an kalpui ngawrh lehzual hle. Chhun leh zanah beihpui thlakin, ruihhlo tawlhrutute leh ruihhlo zawn chhuah hna hi nasa takin an thawk a ni.

CADS-te leh Excise & Narcotics Department-te hian thawhhona tha tak an nei reng. CADS-te hian ruihhlo a awm ngei tih an finfiah hnuah khawihche loin, dan anga hmalatu tur Excise & Narcotics Department kutah hian an hlan thin a ni.