News

Mizo Zirlai Pawl (MZP) chuan kum 2015 atang tawh khan September 2 apiangin “hnamdang nupui pasal nei lo tura inzirtirna ni” chu an lo hman tawh thin chu chhunzawmin, vawiinah pawh Aizawla sikul paruk St. Joseph HSS, Mt. Carmel School, Govt. J.L HSS), St. Anthony’s HSS, Solomons’ High School leh Greenland HSS hun an hmang. Aizawl bakah sistrict thenkhatah MZP Hqrs leh Sub-Hqrs bul tumin hnamdang nupui pasal neilo tura inzirtirna hun hman a ni.

MZP hruaitute chuan sikul hrang hrangah hian Mizote chu chimral tham lek khawp a tlem kan la nih thu sawiin, “Khawvel-ah hnam tlem zawkte boralna thlentu leh boral chhan awlsam ber chu inneih-pawlh hi a nih avangin hetiang inzirtirna hi MZP chuan a kalpui thin,” tiin hnamdangte chu thianah siamin, nupui pasal atan erawh chuan kan ram, kan hnam a boral loh nana mahni hnampui ngei neih tum turin zirlaite an fuihin an zirtir.

Mizoram hi tu kutah mah dah a phal ngai dawn lo tih sawiin MZP hruaitute chuan, “State thenawm Tripura-ah chuan a ram neitu zawk Debarma (Indigenous People)-te chu tunah chuan minority dinhmunah ding tawhin, kum 20 hmalama a ram neitu ni miah lote thuhnuaiah tunah chuan an kun mek a ni. Chutiang dinhmunah chuan keini Mizote pawh hi ding ve thei kan ni a, kan ram Mizoram-ah ngei hian hnamdangte thuhnuaiah kan ding ve thei tih hriain chutiang ang a thlen loh na tur chuan kan lo in ven lawk a ngai,” an ti.

MZP hruaitute chuan kan state thenawmte buaina ang hi kan tawh ve mai loh nan hnamdang lakah inphatsan mai lo tura zirlaite sawmin, “Kan pi leh pute hunlaia kan Mizo nun zemawi tak aia upa zah, tlawmngaihna, rinawmna leh huaisenna te hi kan chhawm nun zel hi a pawimawh em em a. Mizo hmeichhia in hnamdang pasal a neih chuan ama nihna a bo lo a, mahse a fate chu Mizo an ni thei tawh lo, an pa hnam an chhawm tawh a ni tih ‘The Mizo Marriage and Inheritance of Property (Amendment) Act, 2026’ ah chiang takin a in ziak. Schedule Tribe (ST) certificate an nei thei tawh lo,” tiin ST quota hrang hrang, scholarship leh hamthatna dang an chang thei tawh loh thu a sawi.

Mizo kan nih vanga hamthatna kan neih chung pawh hian IAS, IPS kan tling tlem tawh em em tih sawiin MZP hruaitute chuan, “Mizo DGP leh Chief Secretary tur pawh kan van tawh hle. Chuvangin zirna kawngah tan kan lak sauh sauh a pawimawh em em. Mizote kan tanrualna zarah hlawhtlinna tam tak kan chang tawh a. Kan hnam a bo chuan he inlungrualna hi a bo ve dawn a ni,” tiin Mizo hmeichhia te hi kan hnam kal zel tur atana pawimawh ber an nih avanga, hnamdang laka rilru pe lo turin an fuih a, Mizo mipate pawh ruihhlo bawih a tang lo tur leh kan hmeichhiate tana neih tlak leh inngahna tlak nih tum theuh turin an chah.