Hnathawktu hlawh an pek loh pek tir

Lenkawl Editor Zonuna Kawlni hnen atanga Bengvarna thudawn danin, Serchhip District Commission chuan tunhnai khan consumer-ten harsatna an thlenah thuremna tichhuakin, KIFA Company dintute chu an hnuaia hnathawk, Serchhip Darnam Veng a mi hlawh an pek kim loh Rs. 21,000 a pek tir.

February 10, 2026 khan Serchhip District Commission chuan Consumer Court Case No 10 of 2025-ah thubuai remna a tichhuak a ni. Thubuai remna atanga a lan dan chuan November 6, 2025 khan Serchhip Darnam Veng-a cheng, Lalnunsangi chuan Serchhip District Commission-ah hian KIFA Company, Bawngkawn Brigade Road, Aizawl lakah thubuai thehlutin, he company hian an hnuaia a thawh laia a hlawh, July 2024 – September 2024 (Rs. 21,000) chu an pe duh lo tih a thlen.

Consumer Court-ah he thubuai hi ngaihtuah niin he thubuai ngaihtuah lai hian he company hi ding tawh loin a dintute hian an bansan zo tawh. Amaherawhchu he company a din laia a khaipate chu mawhphurh tirin he company an din laia an bungraw la neih ho te chu court hian a tihral tir a, hemi atang hian he thubuai thehluttu pawisa an la pek loh Rs. 21,000 an pek tir ta a ni.