News

Vawiin (19.5.2026) hian Home Minister K Sapdanga hovin Mizoram Sawrkar leh HPC-D (LF) te Inremna thuthlung (memorandum of settlement) in a ken tel, Charter of Demands-a tarlan point hrang hrangte tihhlawhtlin dan tur leh a bawhzui dan tur ngaihtuah a ni.

Charter of Demands-ah hian Lalhmingthanga Sanate hova HPC-D Cadre inpe tate intundinna tur mai ni lo, Hmar tlang dung huap hmasawnna tur rawtna tha tak tak a tel. Inkalpawhna tha siamte, mipui mamawh tak tak – zirna in tha leh sawrkar office din belhte leh lo neia eizawngte tana chhenfakawm, agro-based industries din leh a dangte a tel a ni.

Meeting chuan HPC-D(LF) te mamawh leh ngenna hrang hrangte chu uluk taka thlir nawnin department hrang hrang kaihhnawih thil a nih hlawm avangin, a changtu department theuhah hma lak thuai a nih theih nan lehkhaa thlen ni se, an ti. A theih ang anga bawhzuiin hmalakna report pawh dil khawma thlirho leh thuai an rel.

Meeting-ah hian Adviser to CM (Political) Lalmuanpuia Punte, MLA, Home Secretary leh Home Department officerte bakah, Sr. SP CID(SB) te an tel.

Tarlan tawh angin Mizoram Sawrkar leh HPC D (LF) chuan April 24, 2026 khan Sawrkawrdaiah inremna thuthlung an ziak a, chumi hnu April 30, 2026 khan CTI, Sesawngah an ralthuamte an tung a ni. Ralthuam tun inkhawmah hian Chief Minister Lalduhoma chuan HPC-D (LF) hotu Lalhmingthanga Sanate hnenah dummy cheque (cheng vbc. 1.29) a hlan. HPC D (LF) rawn kirte hi mi 43 an ni.