News

Home Minister K Sapdanga chuan vawiin (30.12.2025) hian kumthar lo thleng tur pualin thuchah a ti chhuak a, halpuah leh halmawi hal lo tura inngen hrehawm a tih thu a tarlan rualin, damlo leh chak lo zawkte vangin hal lo turin mipuite a ngen.

HOME MINISTER THUCHAH :

Mizoram mipuite leh Zo hnahthlak ram pawna awm zawng zawngte Krismas leh Kumthar Chibai ka buk a che u.

Kum 2025 Krismas chu Mizoram mipuiten boruak ralmuang tak hnuaiah hlim takin kan lo hmang liam ta. Thahnemngai taka tawngtai thin kohhran mipui te, veng tina zankhuaa duty thin tlawmngai pawl hrang hrangte leh, dan kengkawhtu Police leh Excise force-te thawhrimna avang a ni a, mipuiten thu kan awih tlan avang pawh a ni. Hengte avang hian, mi tinte chungah lawmthu ka sawi e.

Tunah hian kum 2026 kumthar lawm turin kan inbuatsaih leh mek a ni. Nikum lamah khan, dan tlawhchhanin, halpuah leh halmawi hal lo turin kan inngen a, mi tam zawkin kan zawm tha hle a, lawmthu ka sawi. Halpuah leh halmawi hal hi a nuamin, a hlimawm hle mai a, han inkhap leh, ti lo tura han inngente pawh a hrehawm khawp mai. Mah se, damlo leh mi chak lo zawkte hian, halpuah ri leh halmawi khute hi an manganphah em mai a, hei vang chauh pawh hian, insum hram turin mi tinte kan ngen leh a ni.

Mizote chu tanpui ngaite tanpui thin, khawngaihthlakte khawngaih thin, thlaphangte thlamuan thin, lusunte pawh tlaivara tawrhpui thin hnam kan nih kha. Kha Zo nun ze mawi kha lan chhuahtir thar leh ila. Halpuah leh Halmawi hmangin tumah thlabarin i siam lo ang u. Nu leh pa, thalaite leh naupangte zah tak chungin, he ngenna hi ka han siam a ni. Kum 2026 kumthar atan mi tinte chibai ka buk a, duhsakna sang ber ka hlan e.