Homestay kan uar dawn &#8211; Lalnghinglova Hmar

ZPM chuan vawiin (8.12.2025) chhun khan an office-ah chhung inkhawm an hmang a, thusawitu Tourism Minister Lalnghinglova Hmar chua homestay an uar dawn thu leh sorkar chu sumdawng a nih loh thu a sawi.

Tourism Minister chuan an hunlaiin rel a lo thleng thut tih sawiin, “Kar hmasa khan kan thianpa pakhat Delhi lama mi chuan, ‘ka vannei khawp mai, hotel neitupa nen kan inhre tha a, room min pe hlauh mai. Aizawla hotel pangngai deuh chin kan zawt chhuak vek a, room a awl lo’ a ti a, hei hian Mizorama tourism hmasawnna a entir. Tunah hian Tourism project khawih mek leh thawh hmabak, sanction awm tawh kan neih zat belhkhawm hi cheng nuai 34,990.9 a ni. Hei bakah Mizorama tourism project lian ber zinga mi ni thei tur, sum lian tham pawh a lo luh zel kan beisei mek,’ a ti.

Project aia a ngaih pawimawh leh tourist hip tura a ngaih zawk chu khualzin kan lawm dan, kan dawnsawn dan, an tlawh duh tur hmunhma kan sawngbawl dan, an lo kal duhna tura ‘event’ kan siam thiam danah a innghat tih sawiin Lalnghinglova Hmar chuan, “Sorkar hi sumdawng a ni lo a, hlawk a tum lo a, mipui hlawk se a duh. Home stay kan uar dawn a, Bana Kaih hnuaiah Homestay Scheme kan duang,” tiin CSR atangin pawisa hlawm lian deuh home stay atan an neih dawn thu a sawi.

Tourism Minister event kan nei that sawt thu sawiin, “Vantlang mipui tan Community Based Tourism hi kan duh a ni a, a hlawkna mipuiah kal rawh se. Hnahsin Kut-ah kan lawm em em – sorkarin nuai 30 chuangin a pui. Stall inhralhna cheng nuai 200 a tling a, mipui nuai chuangin an tlawh a, pawisa che vel cheng vbc. 15 vel niin an chhut. Hotel, Guest House, Home Stay thleng zat Mizoram chhungah 5100, India ram state dang mi 805, India pawn mi 56 an tling. Leitlangpui, Winter Festival (Krismas theme-in kan kalpui dawn), Anthurium Festival (Horti nen), Sakawrhmuituai Sunset (December 31), Phuaibuang Paradise (Jan 6&7), Aizawl International Half Marathon (Feb 14), Chapchar Kut te kan hmabak a la ni,” a ti.