HPC-D (LF) in ralthuam an tung ta

Vawiin (30.4.2026) chhun hian CTI, Sesawngah HPC-D (Lalhmingthang’s Faction) chuan Chief Minister Lalduhoma, Assembly Speaker Lalbiakzama, Home Minister K Sapdanga, Lok Sabha MP Richard Vanlalhmangaiha, minister leh MLA eng emaw zat bakah official thahnem hmaah an ralthuam an tung ta.

HPC-D (LF) mi leh sate hi an hotupa Lalhmingthanga Sanate hoin mi 43 an ni a, an ralthuamte chu Mizoram Sawrkar aiawhin IGP H Ramthlengliana’n a lo dawng. Ralthuam an tun zawhah tharum thawh zawnga che tawh lo tur leh ram leh hnam tana mi tangkai tak ni turin an intiam.

Ralthuam an tunte chu rifles 18, pistol 4, mortar 2, walkie talkie 8, mortar mu leh silai mu eng emaw zat a ni.

He huna tarlan a nih danin, kum 1986 khan Hmar Peoples Convention (HPC) din a ni a, kum 1995 khan Mizoram Sawrkar nen an inrem. HPC leh Mizoram Sawrkar nena inremnaa lungawi loten kum 1995 ah HPC (Democratic) an din leh.

Kum 2011 ah HPC (D) chu pawl pahnih Zosangbera Faction leh Lalhmingthanga Sanate Faction-in a hrang a ni. H Zosangbera Faction leh Mizoram Sawrkar an inrema, Lalhmingthanga Sanate Faction leh Mizoram Sawrkar chuan April 24, 2026 khan Sakawrdaiah inremna an ziak ve leh. Tichuan, vawiinah ralthuam an tung ta a ni.