HSLC leh HSSLC result tihdan thar duh lo

Mizoram Independent Schools Association (MISA) chuan vawiin (8.5.2026) hian Aizawl Press Club-ah press conference neiin, HSLC leh HSSLC result-ah merit List, subject topper, letter hmuh zat leh division tihlan loh an duh loh thu an sawi a, zirna standard tlakhniamnaah an ngai.

MISA thusawite :

1.MBSE-in kumin HSLC leh HSSLC result a tihchhuah dana, merit List, subject topper, letter hmuh zat leh division a rawn tilang ta lo hian Mizoram mipui a barakhaih nasa hle in zirlaite tana rualelna (competition) tha tak a nuai bo tur hi matric leh class-XII zirlaite tan a pawi kan ti tak zet a ni. Matric result chhuak boruak huhang sang tak ni thin kha a reh ta ruih mai a ni.

Hei hian mimala result nei tha leh sikul result nei tha te tarlan lo ni thin chu rawn thai boin, ang khat vekin a rawn hrut rual ta a ni. Deficit school, private school leh sorkar school te, ngawrh tak leh taima taka zirna kalpui thinte leh a lehlamah inthlahdah taka zima kalpui tute nen ang khat vekin an result a rawn hrut rual ta mai hi standard tlak hniamna namen loah kan ngai a ni.

A tawi zawngin sawi ila, inelna sang tak hmanga zima quality sang tak kan lo neih thỉn chu inelna awm lovin a tlu sawp dawn ta kan ti lo thei lovang.

2.Zirna hi thang khat lian zet chu CCE Pattern-in pawi hniam lamah kalpui a lo ni tawh a. Hei hian kan elementary education a sawpchhe hneh hle a, a hrechiang leh a chik Nu leh Pa te chu an rum vawng vawng a ni ber e. Hei hi a chhan chu CCE hian no detention a ken tel vang a ni. Mizo naupangin pawl 1 atanga pawl 8 thlengin a fail theih loh tih hian an rilru a ti hniamin, an thahnem ngaihna, taihmakna leh tih hram hramna awm thin kha a nuai bo ta daih hi thil pawi tak a ni. Hetiang anih tarwh nak a laia HSLC/HSSLC a competition awm thin paih bova a hniam zawnga tlan a result chipchiar lo tak a chhuah hian Zofate zirna nasa takin a pawt hniam dawn tih a chiang em em a ni.

3.Hetiang anga result chhuah dan thlak danglam a lo nih chhan chungchangah kan MBSE leh Sorkar lama a changtu minister te sawi dan chuan :- i) By-heart system nuai bo an duh vang te, ii) Zirlai exam turte rilru hah lova exam tir an duh vang te leh, iii) ICSE leh CBSE te pawhin result an tih chhuah in merit list an tichhuak ngai lo tih vang te ni awmin an sawi hi thil awmze nei ril lo tak niin a lang.