Apr 29, 2026
Wednesday
Vawiin (29.4.2026) hian Education Minister Dr. Vanlalthlana chuan a office-ah thuchah sawiin, Mizoram Board of School Education (MBSE) buatsaih Higher Secondary School Leaving Certificate (HSSLC) Examination 2026 result chhuakah zirlai exam hmachhawn mi 12,243 aṭanga za zela 87.67 laiin hlawhtlinna an chang thei leh kum hmasa aia pass percentage zaa 6.57 laia a sang chu lawmawm a tih thu a sawi.
Education Minister chuan kumin result chhuakah Govt Higher Secondary School zirlai pass zat chu stream hrang hrangah zaa 80 chung lam an ni thei vek tih sawiin, “Kum hmasa lama result neih dan han thlirin zirlai pass percentage zaa 80 an la pel ngai lo a, kuminah erawh chuan stream tinah an pel vek. Sorkar sikula zirtirtute leh zirlaite taimakna a lo lang chu a lawmawm. Candidate zawng zawng pass vekna sikul neitu zirtirtute leh zirlaite ka lawmpui hle,” a ti.
Zirlai hlawhtlinna chang thar zawng zawngte thinlung taka a lawmpui thu leh zirna sang zawk an zir chhohnaah hlawhtlinna an chan zel theih nan duhsakna sang ber a hlan thu sawiin Dr Vanlalthlana chuan, tun ṭuma hlawhtling rih lote chu beidawng mai lova nasa zawka ṭan la sauh sauh tur leh chhungkua leh ram tana hlawhtlinna sual chhuak turin anmahniah theihna duhawm tak a awm tih hre reng turin a chah a ni.
Education Minister chuan a hun taka result tih chhuah a nih theih nana thawktu MBSE officer leh staff te, higher secondary school zirtirtute, zirlaite leh nu leh pate, khawtlang hruaitute leh zirna kaihhnawiha thawktute zawng zawng chungah lawm thu a sawi a, Mizoram zirnain hma a sawn zel theih nana theih tawp chhuah chhunzawm zel turin zirna kaihhnawiha thawktu zawng zawngte a sawm nghal a ni.
Dr Vanthlana chuan HSSLC pass zawng zawngte chu zirna kawngpui pengthuam atanga kal darh a lo ngai dawn ta tih sawiin, “Milru puitlingte chu he hunah hian an danglamna a lo lang thin. Kawng zawh tur thlan kawngah te leh damchhunga hnathawh tur thlan kawngahte hun pawimawh a ni. Kawng zawh tur theuhah hlawhtlinna paw chhuak thei turin tan lak a ngai hle dawn,” a ti.
Education Minister chuan kan ramah zirna tha a awm theih nan sorkar leh mipuite lungrual taka kan tanho a ngai tih sawiin, “Kutbeng rimawi siam turin kut pahnih a chet a ngai ang hian zirna kawnga hlawhtlinna nei turin sorkar leh mipuite kan tanrual a ngai a ni,” tiin nu leh pate chu an fate zirna ngaihsak deuh deuh tur leh Mizoram tana mi chhenfakawm chher chhuak tura theih tawp chhuah turin a sawm a ni.
