Huaisen chawimawina hlan

Vawiin (2.12.2025) chhun khan Ministry of Home Affairs atanga mi huaisen chawimawina ‘Jeeven Raksha Padak Award 2025’ dawngtu, Laltlanzova, Tlangsam, Champhai District chu Home Minister K Sapdanga hoin a office-ah lawmpuina hun leh chawimawina hun hman a ni. Home Minister hian award-in a kentel chawimawina tangkapui, citation leh pawisa fai Rs 1,00,000/- a hlan a ni.

Home Minister chuan Mizote’n kan ngaihhlut em em chu mi huaisente an nih thu sawiin, “Pi leh pute hunlai atang tawha kan thupui ber pakhat pawh ‘thian chhan thih ngam’ tih a nih thin thu sawiin, tunlai khawvelah hetianga mi dangte nunna chhan nana mahni nunna thap ngam, mi huaisen kan nei leh, India ram pum huap chawimawina dawng thei kan nei hi a lawmawmin a ropui takzet a ni,” tiin thangthar lo awm lehzel turte tan pawh entawntlak tak a nih thu sawi.

Jeeven Raksha Padak Award hi chhiatna leh chetsualna kara huaisen taka mi nunna chhanchhuaktute hnena hlan thin niin, he chawimawina hi mi huaisen bikte dawn thin a ni. Laltlanzova hian September 7, 2024 (Inrinni) khan Khawzawl District, Dulte khawdai, Dilmawiah tui tla an awm tih a hriat veleh tui tla chhan nan tuiah a zuang lut ve nghal a; Dilmawi hi feet 50 zet a thuk niin, theihtawpa a beih hnuah tui tla hi la chhuakin, a nunna a chhanhim a ni.

He a thiltih ropui tak avang leh mi nunna hlu tak a chhanchhuah avang hian Jeevan Raksha Padak Award 2025 dawng tura thlanchhuah niin, vawiin hian chawimawina hi hlan a ni ta a ni.