IAF hnena ram hralh to lutuk a mak &#8211; Zoramthanga

MNF President Zoramthanga, Ex CM chuan Lengpui ram India Air Force hnena hralh to lutuk chu mak a tih thu a sawi.

Vawiin (16.2.2026) a MNF-in AMC inthlan lo awm tura an candidate turte Vanapa Hall-a an puannaah Zoramthanga chuan, “Lengpui ram airforce hnena hralh to lutuk kha a mak em em. Hman aṭangin airforce hian ram lei tur Congress leh MNF hunah pawh khan an zawng. A ṭha alawm, a thuphungin kan ti. An tih tak takna erawh chu May 15, 2025, khan preliminary notification a chhuak ta a ni,” a ti.

An ram lei tur ZPM Sorkarin a zawng a, bul an ṭan ta tak tak nia sawiin Zoramthanga chuan, “Social impact assestment danin neih ngei ngei tur a tih kha nei ta loin, Revenue Minister khan a ṭul love, a tiin a cancel hmak mai a ni,” tiin Parliament dan siam ZPM minister pakhatin a ṭul lo, lo tih ve ngawt tur a nih loh thu a sawi.

MNF President chuan an candidate puan chhuah takte chu chhuanawm an tih thu sawiin, “MNF candidate kan puan tawh zawng zawngah a chhuanawm ber pawl an la ni tlangin ka hria. An chanchin kan ngaithlak khan an chhuanawm zia a lang chiang hle a. An ward ṭheuh mipuite an vote hlu tak lo hlan ṭheuh turin ka ngen a ni. Pathian leh mipui zarah hnehna kan chan ngei ka beisei,” a ti.