Feb 21, 2026
Saturday
Tukin (February 21, 2026) dar 7 khan MZP, College SU leh Hnampual hruaitute’n Aizawl khawpui chhung Kulikawn, Dawrpui (Bazar), Vaivakawn leh Bawngkawn-ahte hnamdang (vai) dan loa rawn lut an endik a, ILP nei lo/fel lo mi 68 man niin, thuneitute kutah hlan nghal an ni.
MZP hruaitute chuan, dan lo a hnamdang (vai) dap chhuahnaah hian kum rei lote chhungin thil inthlak danglam tam tak a awm thu an sawi a, “Vai hnathawk tura kal a tam zawk hi Assam registration lirthei khalhin, Liscence nei loa khalh tam tak an awm,” tiin Aizawl leh a chhehvela lirthei khalh an tam ta lutuk pawh an vei hle thu an sawi.
Heng bakah hian, ILP a in ziak, purpose of stay nen a inmil lo lutuk a hnathawk awmte pawh tam tak man an ni a, vai leh vai in sponsor 7 man an ni bawk.
Vai leh vai in sponsor awm hi MZP chuan mak a ti hle a, hemi chungchangah hian sawrkar thuneitute pawh hma la nghal tur leh ILP pekchhuah kawngah a ti diklo tu an awm anih chuan, chhui chhuaha hremna pek ngei MZP chuan an phut.
