Inremnain bul i tan ang u &#8211; Duhoma

Vawiin (12.1.2026) ZPM chuan party office-ah kum 2026-a 0arty chhung inkhawm hmasa ber an hmang a, thusawitu Lalduhoma, Chief Minister chuan, “Kan party-a awm zawng zawngte, kan zavai hian ngaihdam ngai apiang inngaidamin he kum thar hi inremnain bul i tan ang u,” a ti.

Chief Minister chuan, “Kan hriat angin 2023 kum tawpah ni 7 chhungin theihtawpin tan kan la nghal chuta tang chuan vawiin thlengin kan overdraft leh tawh lo a ni. Committed liability an tih hi leibat hlui kan tih kum hnih chhunga kan tihfel hi cheng nuai 6,311 a ni. La rulh hmabak hi nuai 7,646 kan nei. Kan tih nimiah lo min hnutchhiah ang hi keini chuan neih ve kan tum lo. Kan health care scheme system aia tha hi hmanni deuha Punjab state-in an rawn duan thar bak kha chu India ramah a tha ber kan ni. Kan sorkar atanga ni 20 lekah CBI-ah General consent kan pe nghal. Buhfai buk a dik nghal em em ringawt pawh hi a thlarau lam thil a, retailer-in sembang an hralh thin kan ti tawp,” tiin retailer lawmmante pawh an tih pun thu a sawi.

Sorkar department hrang hrang hmalakna te sawiin Lalduhoma chuan, “Kawng siamna khawl pawimawh kawng siamna sawisak kan tuar zeuh zeuh a, kawngtha neih duh lo leh ZPM sorkar hmingthatna daltute hi man chhuakin na takin kan hrem zel dawn a ni. Kan tum ber ram rorelnaah Pathian ram thlen tir a ni a, kan sorkar hnu hian chutiang ang thlenna tur chu Pathian in min pe a, USA atangin Go Harvest-te lo kalin thalai rualte an lo kal a, an vei ber ram rorelna siamthat, Pathian ram thlentir kha an lo thupui ber. Chutiangin Youth Festival, asing tel a Pathian faka Lammualah an in kokhawm thei te hi a lawmawm hle a ni,” a ti.