Inrenchem dan tur ruahman

Mizoram Sawrkar chuan West Asia buaina thlir chunga Prime Minister ngenna angin sum leh pai renchem leh tuialhthei hman tlem dan tur a hnuaia tarlan ang hian a ruahman.

Work from home: Department tinah thawktu za zela 20 te chuan in atangin hna an thawk ang. Vantlang tana thil pawimawh a buai loh nan, work-from-home kalpui dan tur duty roster chu Administrative Head/Head of Department-ten an siam tur a ni. Mahse, medical and emergency services, water supply, power supply, disaster response, transport services and law and order duty-te work for home hian a huam lo ang.

Hna thawh hun inthlak danglam: Aizawl khawpui chhung sawrkar office te tan lirthei tawt leh tuialhthei hek nasa lutuk tih tlem nan hna thawh hun inthlak danglam a ni ang, Pawl hmasa zawk chu zing dar 8:30 atanga tlai dar 4:30 thleng office an kal ang a, pawl hnihna zawk chu zing dar 10:30 atanga tlai dar 6:30 thleng an kal thung ang.

Sawrkar motor khawih loh ni: Tuialhthei senso renchem nan kar tin Nilaini apiang ‘Sawrkar Motor Khawih Loh Ni’ a ni ang. He niah hian officer leh thawktute chu ke a kal emaw, mipui chuan lirthei hman uar turin thurawn pek an ni.

Video conferencing: Sawrkar zin senso leh tuialhthei hman tlem nan, department zawng zawngin an field office-te nen meeting an neih dawnin theih ang tawkin video conferencing hmang tur a ni.

VIP convoy tih tlem: Mizoram chhungah Chief Minister, minister leh mi pawimawh dangte convoy lian tham chu mahni duhthu ngeia tih tlem a ni ang.

Ram pawn zin khap: State sawrkar hnathawk, constitutional leh statutory body, public sector undertaking leh board-a hnathawkte pawh, thil tul leh pumpelh theih loh a nih loh chuan ram pawn an zin khap a ni. Zin a tul a nih pawhin thuneitu phalna lak ngei tur a ni.

Sawrkar zin tih tlem: Mizoram chhung district hrang hrang kar zin leh state pawn lama sawrkar zin chu a tlem thei ang berah tih tlem a ni ang a, a tul tawpkhawkah chauh zin tur a ni.

Department zawng zawngte chu an office theuh ah electric renchemna atana a hnuaia mite hi zawm turin hriattir an ni:

i.Hna thawh hun zawh ah light, fan leh hmanrua dangte off vek tur.
ii.Air conditioner hman loh hram tur
iii.Office hun zawh ah building pawn lam eng hmet thim tur
iii.Ni êng theih ang tawka hmang tur. National programme pawimawh bik tih loh ah chuan sawrkar building chei nana eng hman khap a ni