International Women’s Day hmang

International Women’s Day Organizing Committee, State Hub for Empowerment of Women (SHEW), Directorate of Women & Child Development-te buatsaihin vawiin (18.3.2026) chhun khan Dawrpui Multipurpose Centre-ah International Women’s Day 2026 hman a ni a, Chief Minister Lalduhoma leh Social Welfare, Women & Child Development Minister Lalrinpuii’n an hmanpui.

Chief Minister chuan mipa leh hmeichhe tih tlan theih leh nih tlan theih china tehin Mizoram chu India rama hmeichhiate dinhmun that berna state zinga mi a nih a rinawm thu sawiin, “He dinhmun kan thlen theih chhan chu thil tam tak karah kan hnamzia vang te, kan sakhuana vangte leh MHIP leh hmeichhe pawl hrang hrangte hmalakna vang a ni. Mizo hmeichhiate chu eizawnna kawngah pawh sawrkar hna sang mai piah lamah sumdawnna lamah leh entrepreneurship lamah te rilru puitling tak puin, a tlem emaw a tam emaw, eng emaw tal lo thawkchhuak ve theia awm an tum hram hram thin. Hmeichhiate hmasawnna ram a nih avangin khualzinte pawhin an rawn ngaihven a, an sawi darh mek a ni,” a ti.

Mizoram Sorkarin hmeichhiate a ngaihsakzia lanna pakhat chu an flagship scheme Bana Kaih-ah a nih thu sawiin Lalduhoma chuan, “CM Special Package Pilot phase-ah mi 2255 zinga 985 chu hmeichhia an ni a; CM Special Package Phase II, tun hnai lawka sem chhuahah mi 458 zinga 211 te chu hmeichhia an ni a; Phase II hnuaia dilna approved tawh, la sem chhuah si loh 397 awm mek zinga 196-te chu hmeichhia an ni. Loan component lamah pawh pilot phase-a loan sanction tawh 394 zinga mi 119 te chu hmeichhia an ni a, Phase II-a loan sanction tawh mi 10 zinga 4 hmeichhia an ni,” tiin Mizote chu hmakhawsang atanga hmeichhiate dinhmun dah hniam ve lo tia sawi theih kan nih thu a sawi.

Chief Minister chuan chan chhiatna lai ber nia lang thin, ‘mak chhiat’ an tawh chang emaw, ‘sum chhuah’ emawahte dinhmun chhe taka an awm thin chu, sorkarin ‘The Mizo Marriage & Inheritance of Property (Amendment) Bill, 2026’ a pawm tak hmangin, dinhmun tha zawk leh zahawm zawkah a hlangkai tih sawiin, “Sawrkar lai mek hian hmeichhe MLA pathum lai a neih bakah Mizorama cabinet minister-a hmeichhia dah hmasa ber sorkar a ni a, a thatzia chu hnam dangte pawhin hmuhpuiin, ‘Women Icon Award’ an pe hial a ni,” a ti.

Lalrinpuii pawhin thu sawiin, “Hmeichhiate’n chanvo an chan theih reng, duhsakna an chan loh avanga an chunga tla lo tam tak a awm laiin, Chief Minister chuan cabinet minister atan hmeichhia ruatin, hmalakna hrang hrangah kaihruaiin, mamawh a thlente a tihhlawhtlinsak thin,” tiin WCD chuan hmeichhe hotu hruaina tha hnuaiah thawhhona tha an neih avangin hmalakna chak takin an kalpui theih thu a sawi.