News

Document lem hmanga Lunglei District Jail-a tangte an chhuah theihna atana a bultumtua puh Jeremia Lalthangtura (25) s/o James Lalzawmmawia of Zemabawk, Berawlui Veng, Aizawl leh a thurualpui nia hriat C.Laltlanhlua (31) s/o C.Lalbiaksanga of Republic Vengthlang, Aizawl, Dictrict Jail, Lungleia a nghet lova ambulance driver hna thawk mekte jail atanga lak chhuah leh an nih hnuah tantir leh an ni.

Police atanga thudawn danin, Jeremia Lalthangtura leh C. Laltlanhluate statement-ah dik tawk lo deuh a awm avangin court phalnain jail atanga lak chhuah an ni. A tul angte tihfel a nih hnuah vawiin (5.6.2026) chhun khan jail-a dahluh leh turin court-ah thawnleh an ni. Vawiin tlai lamah kha chuan jail-a dahluh leh hman an nih a rinawm.

Tarlan tawh angin Police chhuina atanga a lan danin Jeremia Lalthangtura hian heng convict mi 17 te hi lo bum kualin an case-ah appeal a siam sak theih thu leh a hmelhriat ukil a lo biaksak tur thu tiamin pawisa a lo laksak thin a. Tangho hnen atang hian Jeremia hian cheng sangli (Rs.4,000/-) atanga cheng singnga(Rs.50,000/-) thlengin pawisa hi a lo laksak thin a, heng atanga pawisa an hmuh zawng zawng hi Rs.1,35,000/- bawr vel a ni. An pawisa hmuhte hi Jeremia leh C.Laltlanhlua te hian an lo insem thin tih hriat chhuah a ni.

Heng document leh court order lemte hi jail thuneitute hnena an thlen hnuah jail thuneitute hian order hmang hian jail tangte an lo chhuah ve mai thin a ni. Jermey-a leh C Laltlanhlua hi ni 1.05.2026 khan man an ni a, ni 7.05.2026 khan District Jail, Lungleiah dah luh an ni.