Japan mithiamte’n zirtir dawn

Mizoram sports hmelhmang thlak danglam tura hmalakna kalpui mekah, vawiin (December 15, 2025) chawhma khan Mizorama sports coach-te intuaitharna tur, Transforming Sport for the Next Generation: Developing Decision Makers’ tih chu Sports Minister Lalnghinglova Hmar-in Hawla Indoor Stadium, Republic Vengthlangah a hawng. Mizo coach-te hi Japan mithiamten zirtirna an pe ṭhin dawn a ni.

He coach inzirna hunpui hi Mizoram State Sports Council, Nippon Sports Science University leh JICA ṭang kawpin an buatsaih a ni a; Mizo coach-te zirtirtu turin sports lama mithiam Prof. Masamitsu Ito, Nippon Sports Science University, Tokyo aṭangin a lo kal a, Tanako Ayako, Project Coordinator-in a ṭawiawm a, December 18 thleng kalpui a ni ang.

Sports Minister chuan, “Khawvel huapa sports lama mithiam leh zirtirtu ṭha Mizoramin kan chang ve thei mai hi a lawmawm takzet a, a man pek tur ni se kan pek theih loh turin a thlawna zirtirna a rawn pe thei hi kan lawm takzet a ni,” a ti a, Mizo coach-te chu ṭhahnemngai taka inzir turin a chah.

Sports & Youth Services Minister chuan, “Zirlai ṭha nei tur chuan zirtirtu ṭha neih a ngai a, coach ṭha kan neih chuan sports lamah hma kan sawn thei ngei ang tih kan ring. Tuna kan awm dan ngai reng a nih hi chuan kan result a ngai reng dâwn a, kan intuaihriam a, hmasawn kan tum a ngai. India-in hma a sawn a, chu hmasawnnaa kan tel ve loh chuan National Games-ah pawh 28-na bawr velah kan tei kan tei reng a nih hi,” tiin infrastructure mai ni loin sports coaching chu chawi san a ṭul thu a sawi.

JICA, India Senior Representative Eiji Wakamatsu leh a thawhpuite an lo kal. JICA-in Mizoramah hna hrang hrang a thawh tawh thu leh tun ṭum hi sports lama thawhhona hmasa a ni tih sawiin Pu Wakamatsu chuan, “Mizoram Sports Minister-in ṭhahnemngai takin a bei a, vawi eng emaw zat kan meeting a, tunah a tak a chang ta hi a lawmawm hle a ni. Mizoram hian sports lamah pawh theihna sang tak a nei a, kan thawhhona hmangin hma kan sawn ngei ang tih kan beisei,” a ti a; JICA chu Sports lama thawkho tura a inhawn reng thu a sawi.

Transforming Sport for the Next Generation: Developing Decision Makers’ hian ni li chhung a awh dawn. Japan mithiamte hi anmahni sensoa rawn kal an ni.