Jordan Centre hawn a ni ta

Mizoram Synod-in an enkawl tawh tur, Seṭhawna ruihhlo ngaite enkawlna hmun Jordan Centre chu nimin (6.10.2026) khan Synod Moderator Rev. John Raldosanga’n Pathian hnenah hlanin, a hawng nghal.

Synod Moderator chuan Jordan Centre chu a hlawhtlinna tak tak tur chuan taksa lam leh thlarau lam a ṭankawp a ngaih thu sawiin, “Chumi tihlawhtling tur chuan theihtawp chuah a nih dawn,” tiin he centre enkawl tura sorkarin Mizoram Synod a ring tawk chu lawmawm a tih thu a sawi

Rev. John Raldosanga chuan Mizoram Synod hmalakna sawi zuiin, “Synod-in ruihhlo ngai enkawlna hmun pathum a nei ta a ni. Mizoram chhunga home hrang hrang ṭanpui nan Synod-in cheng nuai 80 a pek chhuah dawn,” tiin Jordan Centre hlawhtlin theih nan ṭawngṭai leh thil peka theihtawp chhuah turin kohhran hote a sawm.

He huna khuallian Social Welfare Minister Lalrinpuii chuan Jordan Centre chu thlarau bote hmangaihna nena enkawl ngai a nih angin sorkar aiin kohhranin enkawl se ṭha zawka an rin thu a sawi a, “Kohhran chuan mi puitling tam tak a chhuah theih zawk dawn,” a ti.

Jordan Centre hi March 18, 2026 khan Mizoram Sorkar leh Mizoram Synod-ten memorandum of agreement ziakin, kum 15 chhung atan Mizoram Synod enkawl tura hlan a ni tawh. Tun dinhmunah Director hoin thawktu mi 28 an awm mek a ni.

Jordan Centre, Seṭhawn-ah hian October 7, 2026 (Nilaini) aṭangin admission hawn a ni dawn a, October 20, 2026 (Thawhlehni) aṭangin luh tur a ni ang. A awm man hi thla khatah Rs 3,000 a ni ang a, pe thei lote chu Synod-in a tumsak dawn.