K Sapdanga’n a thawhpui hluite a fak

DP&AR Minister hlui K Sapdanga chuan DPAR-a a thawhpui thinte a fak a, officer-te avangin DP&AR a chan laiin an thutlukna law court-ah khin a awm loh thu a sawi.

Vawiin (26.6.2026) a thuthar thehdarhtute’n a chenna ina an kawmnaah K Sapdanga chuan Chief Minister-in an sorkar tirha a sawi thin ‘no sir ti ngam kan duh a ni’ a tih ang chu DP&AR-ah a hmuh a hriat thu sawiin, “Officer hote avang hian kan hotute’n kum hnih leh a chanve lai DP&AR min enkawltir chhungin kan thutlukna siam law court thleng pakhatmah an awm lo. Hei hi a chhan chu officer-te’n an ven hneh tlat vang a ni,” a ti.

K Sapdanga chuan a thawpui hluite chu an fel em em a, hna an thiam a, chik pawh an chik peih tih sawiin, “Thurawn pawh minpe nasa, hnialte pawh kan in hnial nasa thei. Dan loa thil tih tum a awmte chuan min hnial a, nasa takin kan sawiho thin. Social tak leh political taka ngaihdan kan han rawt vete hi danin a phal loh thilah chuan min hnial thin,” tiin tunhma chuan sorkar hian cho a hlawh \hin a, law court-ah an khing thlak zung zung thin thu a sawi.

DP&AR lak sak a nih chungchang zawhna chhangin K Sapdanga chuan, “Department enkawltu siksawi chu Chief Minister thu liau liau a ni. Midangin thurawnte chu an pe thei. Thutlukna siamtu tur chu CM a ni. DPAR enkawltu thlak pawh CM-in a duh ang tak a siam a nimai. Keini chu CM hnuaia thawk kan ni. Chuvangin, ani hian chang tawh lo se a tih chuan chang lo mai tur kan ni. Rilru na zawngin ka la lo,” a ti.