Ka eiru lo &#8211; John Rotluangliana

MPCC chuan vawiin (22.5.2026) hian an office-ah political session an hmang a, thusawitu MPCC Vice President John Rotluangliana, Ex. Minister chuan a eiruk loh thu a sawi.

John Rotluangliana chuan anticipatory bail a lak avangin tawngkam chhe tak takten an bei tih sawiin, “Mi thenkhatten anticipatory bail a la a, a ngawi ta kar maite min ti. Ka ngawi kar dawn reng reng lo. Vawiin nia SASCI an tih lapse-te hi ka lo thlir ve reng. Kuminah SASCI sum an rawn sem leh ta a, Arunachal Pradesh in vaibelchhe 4900 an dawn laiin Mizoram chuan vaibelchhe 100 kan dawng, a zahthlak a ni. A lapse lo an tihte kha mi thenkhat thahnemngaiin Central Sawrkarah an zuk zawt a, a lo lapse ngei si. India ramah ti tha ber kan nite an tih lah central lamin chutiang ti tha pakhatna, pahnihna kan siam lo an lo ti leh bawk si. Chuti chung chuan engtin nge social media-ah hian kan la in fak luih luih theih. Tukinah pawh an hotupa dawt thu in chhangte kha in lo hmu ve em, chhuak thar a awm leh tawh kha,” a ti.

MNF Sawrkar lai khan skywalk leh ropeway chungchangah ACB-ah FIR an thehlut tih sawiin John Rotluangliana chuan, “He hna hi Congress Sawrkar laia bul tan a nih avangin khatih laia a hminga minister incharge ka nih avangin mi tam takten thil dik lo ti angin min lo hmeh bel thin. Chumi chungchangah kal zelah chuan tunhnaiah min chargesheet dawn a, man hmingchhiat ngei min tum thu hi min duhsaktu ten min hrilh ru. Engang pawhin man mualpho che an tum a, anticipatory bail lo dil teh an ti. Thil harsa turah pawh kan ngai lova, mahse court-ah sawrkar ukilten min object ta tlat a, kan la chhiar lova hun kan mamawh te an ti a, tlai dar 2 ah tih turin judge in hun a pe. May 5 tlai dar 2 ah chuan sawrkar ukilte chuan political pressure a nat lutuk avangin kan object dawn an ti tlat,” tiin sawrkar ukilte chuan thi leh thau pawlhin an bei vak chungin ni 12.5.2026 ah chuan anticipatory bail an hmu tak thu a sawi.

John Rotluangliana chuan ni 19.05.2026 ah chargesheet copy chu court atangin an dawng ta tih sawiin, “Chuta min lo chargesheet-na chu Tourism Information Center sakna tur sum revise estimate a siamtir tih leh, Rajiv Nagar-ah tourist lodge sakna tur pawisa a divert tir tih a lo ni. Engpawh mise, Rajiv Nagar-a tourist lodge te hi sak zawh a ni tawh a, kan hawng tawh nghe nghe a, a bill erawh la pek zawh loh a ni. Tourism Information Centre pawh hi Tourism Directorate bulah office atan a hman nghal ni se tih a nih avangin revise estimate hi siam a ni. April 3, 2018 khan skywalk bul tanna tur hian Sakawrhmuituai tlangah a lungphum phum a ni. Skywalk leh ropeway-ah hian min bei engang mahse cheng khatmah ka eiru lo tih hi Pathianiin min hriatpui a ni. Court-in dik takin ro a rel anga, thudik chu a rawn lang mai dawn. ZPM sawrkar pawh hian an sawrkar ukilte hmangin ti khawtlai zawng ni loin, thudik hai chhuah a nih thuai teih nan hma la turin ka ngen a ni,” a ti.