Apr 28, 2026
Tuesday
Vawiin (28.4.2026) a ZPM-in AMC inthlana hnehna an chan Vaivakawna an lawmnaa thusawitu ZPM hruaitu K Sapdang, Minister chuan AMC inthlanah an candidate-te an thawhrim thu sawiin, tha bik nih zahpui lo turin an party mite a chah.
K Sapdanga chuan ZPM chu thawhrimna hmachhuantute an nih thu sawiin, “Kan candidate-te an thawk rim a, anmahni dawmtu kan MLA te an tang em em a ni. Malsawmna petu malsawm tlakin kan thawk rim ve nite hian ka hre thin. Thawhrimna kaltlanga mipui leh Pathian malsawmna kan chan hi, kan chapopui a thiang ve lo. Chuvangin, kan tawngkam te, kan thusawi te, kan thiltih te kan fimkhur deuh deuh a ngai bik a ni. AMC inthlan hian Aizawl mipuiin ZPM chunga rinna an nghah zia a tilang a, he chakna hi ZPM ta mai ni loin, mipui ta a ni. Min duhsakna leh rinngamnaah kan lawm em em a, Aizawl mipuite chungah lawmthu kan sawi tak meuh meuh a ni,” a ti.
Mipuiin an chunga rinna an nghah avang hian, mipui rinna an tih thlawn a thiang ve lo tih sawiin K Sapdanga chuan, “Kan thiam bik, thei bik, remhre bik lo anih pawhin, kan thawk rim bik tal tur a ni ang. Kan hotupa, kan CM zahawm takin a sawi fo thin sorkar tha zawk siam kan tum a, chumi tur chuan kan theih anga nasain hna kan thawk a, chuvangin, tha bik nih hi i zahpui lo ang u. That bik pawh kan tum tlat reng tur a ni. Tunah chuan AMC leh sorkar inhne rem takin kan kal thei dawn ta,” tiin AMC tha zawk, mipui tana harsatna siamtu ni lo, Aizawl mipui tana awlsamna leh remchang tha zawk siamtu nih ngei an tum thu a sawi.
