News

Vawiin (24.7.2026) chawhma dar 10:30 khan Seminar Hall, Pachhunga University College-ah Mizoram State Archives, Art & Culture Deptt. leh Department of History, Pachhunga University College-te buatsaih ‘Seminar on ‘Archive & Social Memory in Mizoram : Challenges & Prospects’ chu C.Lalsawivunga, Art & Culture Minister chuan khual lian niin a hmanpui.

C Lalsawivunga chuan, ‘Ka vei em em leh ka kalna apianga ka sawi thin chu Mizote All India leh Central Service-a tling thei kan awm ta mang lo hi a pawi takzet. Tun dinhmunah Secretariat-a hna sang chelhtute chu hnam dang an ni fer fur tawh a, Mizoten harsatna kan la tawk dawn. UPSC exam-a kan tlin theih loh laiin kan state thenawmte chu an tling thei reng a, Mizote kan tlin hleih theih tak loh chhan hi kan vei a tul a, mut mawh hnar mawha kan neih a hun takzet tawh a ni. Mizoram chhunga cheng Mizo ni lo, sakhaw dang bia mi thiam tak tak an rawn chhuak zel a, Mizote kan harhchhuah a hun tak zet tawh a ni,’ a ti.

Art & Culture Minister chuan, “Archives hi hun kal tawh leh tun hun min thlunzawmtu a ni. Ram changkang tan chauh ni lo, keini Mizote tan hlei hlei a pawimawh a, document vawnhim hi kan hnam a ral loh nan a pawimawh tak zet a ni. Mizoram Archives hian hma a sawn zel tih ka hriatin ka lawm a, sorkar hmalakna – Mizoram Public Records Acts ennawn rawt a ni a, kum 2024 khan Assembly House-ah sawiho niin pawm a nih hnuah rules siam that tur eng emaw zat a awm a, hmalak chhoh mek a ni. Sorkar hmasain digitisation bul an lo tan kha an fakawm ka ti a, tunah hian chak takin hma kan la zui a, kum 2028-ah chuan 100% digitisation kan tum. School, college leh university te hi kan pi leh pute sulhnu, Mizo history vawn leh chhui kawnga a pawimawh ber pakhat an ni a pawimawh vawnhim leh dahthat hi kan mawhphurhna a ni,’ tiin seminar chhimtu zawng zawngte hlawk taka hun hmang turin duhsakna a hlan.