News

Chief Minister Lalduhoma chuan Lengpui ram hralhnaah chan a neihve na evidence MPCC Vice President John Rotluangliana’n evidence a neih chuan CM atanga a ban tur thu a sawi.

Zonet Cable TV-in an kawmnaah Lalduhoma chuan John Rotluangliana thusawi chu an party-in khinglet ang an tih chuan an khinlet tur thu sawiin, “Khawi atangin nge a hriat. Chiang mang loa ‘mi sawi chhawn mai mai a lawm’ a tih chuan, chutiang mai maia ka hming a tih chhiat a, kan party future thlenga a tih chhiat vangin defamation, kan party lungawina tawk chu a chawi a tul maithei,” a ti.

An ngawih mai mai kher loh tur thu sawiin Chief Minister chuan, “Kan party rel ang angin kan kal ang. Evidence a neih chuan a phawrh ang a, evidence a neih chuan Chief Minister atangin ka bang nghal ang,” tiin John Rotluangliana’n evidence a neih chuan CM thutnaah hian thu tlak loh a nih mai tur thu a sawi.

Tarlan tawh angin, ni 13.2.2026) khan MPCC-in an office-ah chhung inkhawm an hmang a, thusawitu MPCC Vice President John Rotluangliana chuan chiang taka a hriat thawi danin, airport bul ram hralhah Chief Minister-in cheng vbc. 10 a chang niin a sawi.

John Rotluangliana chuan Congress-in airport an er chhuak tih sawiin, “MNF an rawn sorkar a, Kamrula-te nen sum siam nan an rawn hmang a, airport cute an rawn sawi. Tunah ZPM pawhin sum siam nan bawk an rawn hmang a, a bul ram hralh chungchangah a ram neituten vbc. 70 an chan laiin, mantang eituten vbc. 117 an lo ei ve a, a zahthlak hle a ni. ZPM sorkar minister pakhat chuan CM nen chuan kan kut a fai a ti a, mi dang an kut a fai lo em ni tih hi kan zawhna a ni,” a ti.

Ram hralh chungchangah Congress chuan CBI-ah FIR an thehlut tih sawiin MPCC VP chuan, “CM hian consent a pek ngei ngei a ngai a, pe lo a nih chuan ‘dekhega’ kan ti a, kan en liam mai mai dawn lo a ni. Chiang taka kan hriat thawi danin kan CM zahawm tak hian a chan tur chu vbc. 14 a ni a, vbc. 10 a chang ta zawk a, ‘Rangkachakin min pe rawh u,’ a ti e an ti,” tiin hei hi kumthara an thu hriat a nih thu a sawi.