News

Vawiin (12.12.2025) Zirtawpni hian MNF Vice President Lalchhandama Ralte, Leader of Opposition chuan an party office-ah thu sawiin, Lai Autonomous District Council (LADC) inthlana candidate an neih kim loh chhan sawifiahin, “Kan sorkar leh dawn,” a ti.

MNF Vice President chuan Dampa Bial leh LADC inthlanah MNF party chuab thawhhona tha leh result lawmawm an nei tih sawiin, “Hei hian hian kan sorkar leh dawn tih a tichiang hle. Dampa by election-a kan tanrual ang bawkin, LADC inthlanpui hmachhawn nan kan thawhhona a tha. Kan thawhlawm tlingkhawm pawhin inthlan senso a daih vek,” tiin an tanrual zia a tihchian thu a sawi.

Lawngtlai District bialtu a nih angin LADC inthlan chungchang sawiin Lalchhandama Ralte chuan, “LADC inthlana (MNF 8 MDC) result duhawm tak kan nei hi MLA 2028 general election-a kan chakna tur hlimthla a nih avangin kan party thawhhona zawng zawngah lawmthu ka sawi a ni. Lawngtlai District MNF hotuten seat 20 chuh tura rawtna an rawn siam a, a bak seat 5 pawh an ruahmanna ang zelin kan kal. Hqrs-a kan hotute remtihnain a ground-a awmten MNF tana tha zawk tur nia an hriat angin kan kal a ni,” a ti.

MNF Vice President LADC result leh a nghawng sawiin, “MNF Sorkar laiin LADC MDC seat 25 awmah kum 2020 khan Seat 20 kan la. Vawiina ZPM Sorkarah ZPM chuan seat 6 chauh an la a, pathumna an ni,” LADC inthlan result hian ZPM chu mipuiten an hnawl mek tih chiang takin a tihlan thu a sawi.

LADC inthlanah sorkarna siam thei party mal an awm loh avangin an lu a hai hle tih sawiin MNF Vice President chuan, “Seat la tam ber kan nih angin MNF kaihhruai sorkar siampui turin INC nen kan indawr nghal a, ngaih tha taka kan awm laiin, a tuk lawkah INC leh ZPM an lo indawr reng avangin kan thawhhona an titawp. INC nen kan thawhhona tihtawp chhan nia min puhnaah MNF Party aiawha thutawp siam theitute kan tel ve lo,” a ti.