Khawkawnah YMA Kumpuan an hawng

Central YMA President R Lalngheta chuan ruihhlo zawrh avanga kan hnam sawptute sawp let ve a hun tawh thu a sawi.

Nimin (7.2.2026) a Khankawn khuaa YMA kumpuan ‘Ruihhlo Do’ a hawnaah CYMA President chuan, “Kan thalaite ruihhlo avanga nunna chan mek chhanchhuak tur hian hruaitute kan huaisen a ngai a ni. Damdawi zuarten an thiltih an zahpui loh chuan, eng vangin nge keini hian do kan zah bik ang? ‘Thian chhan thih ngam’ kan tih thin hi a taka hman a ngai a, ruihhlo zawrh avanga kan hnam sawptute hi kan sawp let ve a tul tak zet a ni,” a ti.

R Lalngheta chuan ramria police-te thuam chak a pawimawh thu sawiin “Ramria YMA-te’n duty post an siam hian awmzia a neih tel ka beisei. Thil dik lo titute laka case khauh tak kan siam duh a nih chuan, dan zawm chunga hmalak a pawimawh. Kan choka a kang mek a, kan inpui a kan kai hma in kan tan a ngai a ni,” tiin hnam damna tura chetchhuahna chu Pathian rawngbawlna a nih thu a sawi.

CYMA tarlan danin, Khawkawn Branch YMA-ah hian tun dinmunah member mipa 346 leh hmeichhia 364, an vaiin 710 an awm mek a ni. Khawkawn khua hi Manipur luh dawn a Mizoram lama khaw tawp ber an nih avangin, ruihhlo do kawngah branch tangkai tak leh mawhphurhna lian tak nei an ni.