News

UD&PA Department chuan SASCI sum cheng vbc. 104.28 hmangin district khawpui hrang hrangah tuiluankawr an siam dawn. Hei hi khuarel chhiatna laka khawpui himna atana tih a ni. Sum a awm vek tawh a, contractor turte pawh thlan ni tawhin, thenkhatah chuan hna tan a ni tawh.

Tuiluankar siam tur project atana hming an vuah ‘Storm Drain Projects’ chu vawiin (8.1.2026) chhun khan Planning Conference Hall-ah UD&PA Minister K Sapdanga’n a khuh hawng a, project an buatsaih chhante a sawifiah nghal.

UD&PA Minister chuan an project chu khawpui hmasawnna tur chauh ni lo, khuarel chhiatna thleng thei laka khawpui venhimna tur a nih thu sawiin, “Kan khawpuiahte hian hmasawnna hna kan mamawhte zinga hmanhmawhthlak ber chu tuiluankawr \ha a ni,” a ti.

Zirbingna atanga a lan danin Aizawl khawpui chhungah inthiarna leh choka-a tui kan hman ral hi nitin litre mtd 48.6 a nih thu sawiin K Sapdanga chuan, “Heng tuite hi tui luan kawr thleng pha loa leia tham ral deuh vek an ni,” tiin furah a let tam tak a luan thu a sawi.

UD&PA Minister chuan tuiluankawr thleng lo tui hian lei chung lang chiah hnipin, kan chenna khawpui hi a kum telin a derthawng tial tial tih sawiin, “Chhiatna rapthlak kan tawk ang tih a hlauhawm. Hei hi sawrkarin ngaipawimawhin in tin atanga tui chhuak zawng zawng leh ruahtui luan luhna tur tui luan kawr siamna tur Storm Drain Project duan a ni,” a ti.

UD&PA Minister sawi danin, Storm Drain Projects an kalpui tur hi a thawhkhatna a ni a, a tam thei ang ber tuiluankar siam belh zel tum a ni. Tun tuma tuiluankawr siam hmasak tur atan hian leimin thinna, leimin thei tur, mihring tamna leh infrastructure tamnate tunlai thiamna hmanga uluk taka zirchian a ni.

Tuiluankar siamna atan hian Aizawlah cheng vbc. 61.76, Lungleiah cheng vbc. 2.50, Siahaah cheng vbc. 10, Champhaiah cheng vbc. 3.50, Lawngtlaiah cheng vbc. 9, Kolasibah cheng vbc. 2.50, Serchhipah cheng vbc. 2.50, Mamiutah cheng vbc. 5, Saitualah cheng vbc. 2.50, Khawzawlah cheng vbc. 3 leh Hnahthialah cheng vbc. 2 hman a ni dawn.