News

Vawiin (9.6.2026) chawhnu khan Excise & Narcotics Minister Lalnghinglova Hmar hoin a office-ah xcise & Narcotics Department, Home Department, Food & Drugs Administration (FDA) leh Central YMA aiawhten Ruihhlo Do Meeting an nei a, tunhnaia thalai zinga khuh damdawi hluar chho zela hmalak dan tur an ngaihtuah.

Lalnghinglova Hmar chuan tunhnaiah a bikin thalai lamah khuh damdawi ruih a hluar chu thil ngaihmawhawm tak a nih thu sawiin, “Khuh damdawi hi naupang zawkten zu leh damdawi dang an khawihna kailawn langsar tak a ni. Ruihhlo dang leh damdawi hlauhawm tak tak kan vei rualin, khuh damdawi zalen lutuk hi engtinnge kan tihreh theih ang tih hi kan ngaihtuah a ngai. Khawvel hmun dangah pawh uluk taka khuahkhirhna kalpui a ni a, Mizoramah a zalen em em mai hi thil nih dan tur a ni lo,” a ti.

Meeting-ah hian report hrang hrang ngaihthlak niin tunhnaiah a bikin thalai zingah khuh damdawi ruih a zual thu ngaihthlak a ni. Zirlai naupang atanga sakhaw rawngbawltu thlenga a nghawng avangin hmalak dan tur ngaihtuah a tul hle tih sawi a ni.

Tun dinhmuna khuh damdawi hluar dan leh chu miin harsatna a thlen te, hma la tura dan tlawhchhan theihte zirchianna mumal tak neih ni se tih a ni. Harsatna hrang hrang ching fel tura hmalak dan tur te buatsaih a, mapping mumal tak lo ti turin Home Department, Excise & Narcotics Department, FDA leh Central YMA aiawh pakhat theuh ruat an ni. An zirchiannate chu meeting leh hunah thlirho a, hmalak chhunzawm dan ngaihtuah tur a ni ang.

Central YMA in damdawi zuarte hnenah prescription tel loa khuh damdawi hralh lo turin ngenna siam ni se, tiin meeting chuan a rel. Branch tin huamchhunga damdawi dawrte in report turin ngen ni se, tih a ni bawk.

Hmalak chhunzawm dan ngaihtuah turin a ranglama meeting leh ni se, meeting leh hunah hian Social Welfare & Tribal Affairs bakah Mizoram Chemist and Druggist Association te sawm ve ni se, tiin meeting-ah hian an rel a ni.