Kolasib Venglai East Branch YMA an lawm lo hle

Kolasib Venglai East Branch YMA chuan ruihhlo dona kawngah theih tawp an chhuah tawh thin thu tarlangin, “Veng then thianghlim nan Kumpuan Sub-Committe-te dinin hma a lo la tawh thin a ni,” an ti.

An tarlan danin, Lalchhuankimi w/o Lalruatkima (L) te chhungkua Venglai East Branch huam chhunga awmte chuan branch hmalakna zah loin ruihhlo an zuar a, Venglai East indan hma (2020 hmalam) tawh ațanga an ni hi buaipui tawh an ni. Vawi tam tak ruihhlo man sak tawh an nih avangin Branch YMA-in a ensan a, ensan an nih hnu pawhin sim duh loin ruihhlo an zawıh chhunzawm zel a ni.

An chhungkua hi nu valai pakhat leh thalai pathum an ni a, hnathawk thei vek an ni. Ensan an nih hnuah man an tawh leh avangin Venglai East ațanga chhuak tura tih an ni a, hei hi zawm lovin branch huam chhungah an awm luia, hemi avang hian Branch YMA chuan vengchhunga an awm chhung chu an tu leh fate thlengin ngaihdamna awm loin a ensan a ni.

Hemi hnuah pawh hian YMA thuchhuak zah lovin Hmangaihsanga d/o Lalchhuankimi chuan zu khawih chhunzawmin SHYMA-ten ni 28.02.2026 khan Rengtetlangsang Sadaitheu rama an zu zem 2 leh zu thlawr sa litres 30 an man leh a, ani hian home a awm turin a intiam a, mahse ama intiamkamna ngei bawhchhiain a tlan bo a ni.

Branch YMA,-in a nu Lalchhuankimi hi a fapa awmna a zawhin a hriat loh thu in a chhang a ni. A intiam anga a awm loh avangin Venglai East huam chhunga inlan tawh lo turin tih a ni. Branch YMA thuchhuak an zawm mai tura ngaih a nih laiin court-ah Lalchhuankimi kalin Venglai East Branch an khing zui ta zawka, hei hi Venglai East Branch YMA chuan ngai thu tak hlein ni 15.05.2026 (Ningani) zanah Venglai East Branch YMA Executive Committee-ah an chungchang rel a ni.

An chhungkua hian thu leh awm hma chu Venglai East Area a awm leh inlan tawh lo tura tih an ni. Branch YMA thuchhuah zah loa Venglai East Area-a an awm lui a nih chuan Venglai East Branch YMA in a țul angin hma a la chhunzawm zel dawn a ni.