Kuhva hralh dan leh sawngbawl dan zirchiang

Hachhek Bial Kuhva Chingtu Pawl (HBKCP) chuan ki 3.2.2026 khan Mizoram chhuahsanin ni 5 chamin Guwahati leh Meghalaya-ah kuhva hralhna leh sawngbawl dante an zirchiang.

HBKCP member-te hi Guwahati Mizoram House-ah Asst.Resident Commissioner Juliet Chhakchhuaki’n lo dawngsawngin, ARC-te nen ruahmanna an siam hnuah Guwahati area hmuna Fancy Bazar leh Beltola Bazar-a tualchhung kuhva rate leh an zawrh dan kalphungte an zirchiang. Tezpur leh hmun danga kuhva hring leitute leh kuhva sawngbawl lam buaipui ṭhinte pawh biak pawh an ni.

Hemi hnu hian Meghalaya N.Garo Hills Dist khawpui Resubelpara leh a chhehvel a kuhva an sawngbawl dante leh an hralh dante zirchiang lehin, N.Garo Hills-a ABRI FPO Multipurpose Cooperative Society Ltd. hmun tlawhin, kuhva an lei dan leh an sawngbawl dante, an hralh dan system-te zawtfiahin an hmun hmate a tlawh.

HBKCP member-te hi mahni insengso a tour nei an ni a, kuhva market leh processing system chungchang an zir chiannaah hlawk thlak an tiin thil tam tak an zir chhuakin an in hria a ni.