Kuhva smuggling-a inhnamhnawihte kan dim dawn lo

ZPM chuan vawiin (9.2.2026) hian an office-ah chhung inkhawm an hmang a, thusawitu Home Minister K Sapdanga chuan dik takin police an lak leh dawn thu sawiin, thalaite lo inring turin a sawm.

Home Minister chuan kum 2021 atangin kumtin police boral za chuang an awm thin tih sawiin, “Kumtin mi 150 vel bawr pension awm ziah. Post ruak 4,666 a awm ta mek a, tunah hian training mek 250 an awm a, financial year tharah police 200 lak leh tum a ni. A hmaa police kan lak dan ang bawk khan dik takin kan la leh dawn a, thalaite lo inring rawh u. Kum 2025 kha police-te chuan fitness uar kumah kan hmang a, kum 2026 hi discipline uar kumah kan puang ve leh thung. Police-ah chuan posting duhna hmun dil a awm ve loa, a hun takah leh a hmun dik takah engkim tih vek tum a ni,” a ti.

ZPM chuan kuhva smuggling an do thu sawiin K Sapdanga chuan, “Eptuten min do ve thung hi a pawi hle. Politician inrawlhte mipuiin an hnawl a, police inrawlhte pawh an pension zel a ni. Kum hnih chhungin Hachhek Bialin a rah an tel a, chu chu ram mipuiten kan hria a ni. Kan sorkar chuan kuhva smuggling hi kan khap zel dawn,” tiin service lai an ni emaw, civil mi an ni emaw, inhnamhnawih an awm chuan an dim dawn loh thu a sawi.

Home Minister chuan ruihhlo ngaite nasa zawka kan buaipui a ngaih thu sawiin, “YMA kumpuan ‘ruihhlo do’ hi a fuhin a hun a dik tak zet a ni. Aizawlah ruihhlo ngai/ngawlvei an tam em em a, mi sing chuang zet an tling tawh a, zanah phei chuan hmeichhe tan mai ni lo, mipa tan pawh lenchhuah a him lo. Home leh Excise Department bakah YMA-te nena Operation Jeriko chak zawka kalpui tum a ni a, Hulhliap Short Stay, TBCC leh Operation Kingdom Ministry-te hi an hlu tak zet a ni,” a ti.