Jul 28, 2026
Tuesday
Vawiin (28.7.2026) chhun khan Khawzawl District Level Task Force on Child Labour member-te chu National Commission for Protection of Child Rights huaihawt Pan-India Rescue Rehabilitation 4.0 neih mekah Khawzawl chhunga restaurant, workshop leh hmun dangtea naupang kumtlinglo chhawr an awm leh awm loh enfiahin an chhuak.
He hunah hian DLTF chu team pathumah inthenin, Tuisenphai, Dulte, Puilo, Kawnzar, Lungvar, Champhai Road, Zuchhip, Zaingen, Hlunbuang, Hermon, Vengthar leh Dinthara dawr, workshop, quarry, hotel leh restaurant-te tlawhin naupang kumtlinglo chhawr an awm leh awm loh an enfiah a, dawr neitute hnenah India danpuiin naupang kumtlinglo hnathawka chhawr a khap thu an hrilh nghal.
Kumtlinglo naupang hnathawka chhawr chungchangah Khawzawl Bawrhsap chuan thu a chhuah a, Child and Adolescent Labour (Prohibition and Regulation) Act, 1986 chuan naupang kum 14 hnuai lam an zirna tibahlah thei khawpa hnathawka chhawr luih hi a khap tlat a, an zirna tibahlah lo zawnga hna him china chhungte puih bakah entertainment industry a tel erawh chu phal sak an ni.
Tleirawl/rawlthar kum 14-18 inkar te chu hnathawka chhawr phal an nih rualin zan dar 7 atanga zing lam dar 8 inkarah hnathawka chhawr phal an ni loa, an nunna leh hriselna atana pawi thei (hazardous accupations) – thil laih chhuahna hmun (mining), puak thei thil siamna hmun bakah factory hlauhawmah te chhawr phal an ni lo.
He dan kalha naupang chhawrtute chu Rs 5,000 atanga Rs 20,000 thleng pawisa chawi tir leh thla ruk atanga kum hnih thleng lung in tan tir emaw, a pahnih a hrem kawp theih a ni. Dan kalha naupang hnathawka chhawr hria emaw hmu kan awm a nih chuan Child Helpline – 1098 ah emaw, mahni hnaih ber Police Station-ah emaw, Khawzawl Deputy Commissioner Office ah emaw, District Child Protection Unit ah thlen tur a ni.
