News

Nimin ni 10.2.2026 (Tuesday) khan Health & Family Welfare leh Social Welfare changtu minister Lalrinpuii chuan Central Sawrkara Union Minister hrang hrang leh official-te Delhi-ah a kawm.

Lalrinpuii hian Union Minister for Women & Child Development Annpurna Devi nen an inkawmnaah Mizoram atanga nu leh naupang chawikanna project hrang hrang thehluhte a sawipui a, hmun hrang hranga anganwadi centre building chhe lutuk sak thatna tur proposal leh hmeichhe hamthatna tura project a thehluh hrang hrangte chu tun financial year tawp hma a ngei a sanction sak turin a ngen. Union Minister chuan a theih ang ang a tihhlawhtlin ngei a tum thu a lo hrilh .

Union Minister of State for Ayush Prataprao Jadav nen an inkawmnaah Lalrinpuii chuan Mizoram chhung hmu hrang hranga 10 bedded hospital siam belhna tur ruahmannate a sawipui. Pratap Rao-a hian 10 Bedded Hospital, Hortokia siam tur chu supplementary action plan a telh a, pawmpui dan kawng lo zawn sak ngei a tum bakah 10 bedded hospital dang pathum pawh sawrkar kumthar lamah hmalak dan kawng zawn a tum thu Health Minister hi a lo hrilh a ni.

Tin, Ayush hnuaia 10 bedded hospital kan neih mek hnuaia thawktute hlawh tumsak thin pawh kum thar lam atan pawh a tum sak zui leh a lo remtih sak a ni.

Lalrinpuii hian upate pension chungchangah a enkawltu ber Ministry of Rural Development-a Senior Economic Advisor Kalyani Mishra pawh kawmin, upate pension chungchanga harsatna hrang hrangte an sawi dun. SNA Sparsh avanga central lamin upa pension an release theih loh reng chu an chinfel tep tawh thu leh SNA Sparsh a fel hnu chuan a rang thei ang bera release zel an tum thu Lalrinpuii hi a hrilh.