News

ZPM chuan vawiin (20.3.2026) hian an office-ah chhung inkhawm an hmang a, thusawitu AMC term liam chiaha corporator naupang ber Christina Roluahpuii Sailo chuan langtlang takin a sum hman dan ward mipui hnenah an tihdarh thu sawiin, “Politics-a ka zuanglut hi ka inchhir lo,” a ti.

Christina-i chuan Mizo thalaite’n politics hi muangchanga ngaihtuah a, kum upat hnua tel ve chauhna tura an ngai chu hnampui zawkte kan tluk theih lohna nia a hriat thu sawiin, “Kan chak that lai, kan vanglaia ram leh hnam tana pen chhuah hi a tha zawk lo em ni tih hi ka incho vena a ni. Keini thalaite hi kan ram tan a tha lam zawnga politics kuai hertu kan ni thei a, chumi tur chuan huaisen taka ke kan pen luih ve tang tang a ngai. Rual u zawkte thlazar hnuaiah kan ram tan eng emaw tal ka tih ve theih beiseiin politics-ah hian ka zuang lut a, ka inchhir lo,” tiin kan ram tana nasa leh zuala ke pen theihna politics-ah zuanglut turin a thalaipuite a sawm.

Corporator a nih anga hna a thawh dan sawiin Christina-i chuan, “Lang tlang takin Ward Fund zawng zawng Ward Committee kal tlangin kan rel a, Property Tax Return chauh ni lo, Ward Fund zawng zawng hi kan rel a ni. Mipui tam zawkin an chhawr theih tur kan zawngin kan thawk thin. Kan hna thawh dawnah YMA chanchinbuah estimate nen hna thawh tur hrilh hriat thin a ni. Sorkar kum a zawh zelah ward fund hmanna hi ward chhung chhungkaw tinah kan sem leh thin,” a ti.

Christina-i chuan AMC inthlan lo awm turah Aizawl mipuite ZPM candidate-te vote tura ngenin, “Sawrkarna kan chang a nih phawt chuan Aizawl mipui tan ro kan rel dawn. AMC hi contract thawh tur semtu ringawtah min ngai mai ang tih hi hlauhawm tawh. Roreltu kan nih ve ngam tak tak a ngai. Mipui tan phurrit siamtu ni lo a, mipuiten AMC awm hi a ninawm ti loin, AMC pawimawhzia, tangkaizia leh hlutzia an sawi hun hi a nghahhlelhawm tawh. AMC Playground, Bawngkawn suasam a nih dan te hian rilru a tina khawp mai,” tiin AMC Playground ang chu ZPM kaihhruai AMC sorkar a piang a nih chuan an remtih ve loh tur a nih thu a sawi.

Aizawl khawpui bial zawng zawngah ZPM MLA vek an nih thu sawiin Christina-i chuan, “State sorkar tha chakna hmang tel thei corporator-te tan mahni ward enkawlna leh hmasawnna hna thawhna kawngah thil tih a nuam a, hma lak chak a awlsam bik. Kan sorkar leh kan MLA-te hian thawhpui duh loh an nei hauh lo ang. Mahse, duh inang lo, tum inang lo, kalphung inang lo corporator, MLA inthlan leha anmahni tlakna atana bei turte nena thawh dun ai chuan, tum inang, kalphung inang, duh inang corporator nena thawh dun chu an chakın an phur zawk ngetin a rinawm. Phur taka thawh dunna chuan rah tha a chhuah dawn a ni,” a ti.