News

Aizawl Municipal Corporation (AMC) chuan nimin (17.6.2026) khan lei laih, lei laih hmanga khuar hnawh leh a kaihhnawih dangte a khap.

Aizawl khawpui chhungah fur laia leimin avangin chhiatna hrang hrang a lo thleng tawh thin tih tarlangin AMC chuan, “Chenna in leh lo leh bungrua hlu tak tak channa bakah mihring tawrhna, hliam tuar leh nunna channa hial a lo thleng tawh thin. Chuvangin, The Aizawl Municipal Corporation (Site Development & Slope Modification) Regulations, 2017 regulation no. 10 in fur ruahtui tam laia hmunhma siamremna tura leilaih leh a kaihhnawih te khap tura AMC thuneihna a tarlan angin July 1 – October 31, 2026 chhungin Aizawl khawpui, AMC huamchinah lei laih, leivung hmanga khuar hnawh leh a kaihhnawihte khap a ni. He khapna bawhchhiate chu Mizoram Municipalities Act, 2007 Section 137, 374 leh 386 hmangin hrem theih an ni ang,” an ti.

AMC tarlan danin, he khapna kenkawh chhung hian chhiatna lian zawk a thlen lohna tura tul bik thilah phalna dil theih a ni ang. Hetiang tul bik thilah chuan a hmunhma dinhmun chiang taka tarlangin AMC-ah dilna thehluh theih a ni ang a; dilnate hi a hmunah uluk taka enfiah tur niin phalsak ngei ngei tur tihna a ni lo. Lei laih khap hian thlan laih te, chhiatna thleng avanga leimin senghawi leh thenfai tula chetna te, tul bik thil avanga phalna pekte chu a huam lo ang.

File Photo