News

MNF chuan vawiin (9.3.2026) hian an office political session an hmang a, thusawitu MNF Treasurer Lalruatkima, Revenue Minister hlui chuan Lengpui Land Scam chungchangah ZPM Sorkar hmalakna dik lo leh dan bawhchhiatna hrang hrang a awm thu leh mimal anga pawisa a dawng a nih chuan a let sawma rulh zel a inhuam thu a sawi.

Revenue Minister chuan The Mizoram Land Revenue Laws 2013 leh RFCTLARR Act, 2013 hnuaiah Indian Air Force te hian ‘outright purchase’ (a hmun leh a hma-a inleisak tawp) hmangin ram an lei ngawt thei lo tih sawiin, “Indian Air Force lehkha hmasa subject ah land acquisition/ outright purchase an rawn hman vangin an lehkha ang hian bul tan a ni. Dan anga Land Acquisition anga kalpui tur anih vangin outright purchase tawngkam hi hman zui a ni tawh lo. Tin, Lengpui ram 8 te hi Garden LSC ania, Sihphir ram 7 an lei hi House pass leh garden LSC pakhat a nih avangin ‘land lease ah convert leh vek tur a ni. ZPM sorkar vanga land lease a dah leh tur a ni lo, ZPM Sorkar hma daih a The Mizoram Land Revenue Laws 2013 angin Land Lease a dah mai tur ani zawk. The Mizoram Land Revenue Rule Sec 28(2) angin Conveyance Deed Registration Act,1908 angin Thla 3 chhungin an siam tur ani. Dan angin Registrar/ Sub –Registrar ah Stamp registration 3% chawiin an ti tur a ni. The Mizoram (Land Revenue) Act, 2013 Section 75A(4) angin Temporary pass kan tih mai, Sihphir ram a House pass 7- ah te hian 15% share of the Government an chhun luh tir tur a ni. Heng te hi vawiin thleng hian an la ti lo hian he sorkar inthlahdah zia a lang,” a ti.

Congress sorkar khan Article 371G hmangin humhalh kan ni tih in hre rengin The Mizoram (Land Acquisition, Rehabilitation & Resettlement) Act, 2016 kha an lo siam tih sawiin Lalruatkima chuan, “Mahse, Gauhati High Court- Single Bench ah thubuai theh luh anih avangin hmanzui a remchang ta rih lova. Chumi chhunga Land acquire tur a awm chuan National Highways project ah chuan The National Highways Act, 1956 leh Railways project ah chuan Railways Act, 1989 te hmang turin Ni 14//03/2018 ah a notified a ni. Kum 2018 a MNF a sorkar khan MLARR Act,2013 chu Gauhaty High Court Principal Bench chuan W.A. 70 of 2018 a registered tak vangin, Mizo ten ram neitu nihna chanvo leh kan ram humhalhna dan pawimawh Article 371G neitu kan nihna hrereng chungin hma lak zel a nia. Gauhaty High Court thu angin Ni 07/08/2020 khan Notification chhuahin Land acquire tur a awm chuan RFCTLARR Act, 2013 chu High Court thutlukna awm hma chu hman rih mai ni se a ti ta a ni.,” tiin Assembly Session-ah land acquisition dan mumal awm lo leh sorkar hmasa mawhchhiat phet tumna rilru pu in roreltu zahawm tak thenkhatten thudik lo mipuiah vawrh kual an awm chu MNF chuan pawi an tih takzet thu a sawi.

MNF Treasurer chuan sorkar kan hrawn mek hian ‘responsibility’ leh ‘transparency’ vawn nun aiin, thil dik lo a awm apianga sorkar hmasa mawhchhiat leh midang puh hi an kalpui ber nia sawiin, “Lengpui ram IAF tana lak (land acquisition) chungchangah pawh CM leh Revenue Minister te’n DC-te mawhphurhna anga an sawi kha thil mak tak a ni. Land acquisition-ah hian preliminary notification hi a bul tanna a ni a, he notification hi ZPM sorkar ngei hian ni 15/05/2025-ah khan a tichhuak a nih kha,” a ti

Lengpui Land Scam chungchanga corruption awm anga inrinhlelhna chungchangah, MNF Treasurer leh Revenue Minister hlui a nih angin, chengkhat pawh party emaw mimal anga an dawn a hriat loh thu sawiin, “Mimal anga ka lo dawng a nih chuan a let sawm zeta rulh pawh ka inhuam a ni. Kan CM leh Revenue Minister te hian hetiang hian an inhuam ve em? tih hi a zawhna a ni,” tiin CBI-ten an chhui dawn a nih chuan an lawm hle a, a hlawkna lo tel an awm a nih chuan dan anga hrem ngei an phut thu a sawi.