May 24, 2026
Sunday
Vawiin (24.5.2026) chawhnu lam khan Hauruang leh Saizakawn inkara Riangvaite Thlanmual bul kawngthlanga mipa pahnih leh hmeichhe pakhat ruang hmuh a ni a, lirthei chetsualna vanga thi an ni.
Thudawn danin, vawiin (24.5.2026) chhunbdar 1 vel khan Lunglei Police hnenah Laltlanthangi, Hauruang chuan a fapa K Lalhlimpuia (25) leh a thianpa Jerry Lalnunfela (40) s/o Lalzuimawia, Hauruang te nizan (23.5.2026) zan dar 7 vela Lungleia an kal chu an la haw loh thu leh biak pawh theih an nih loh thu a thlen a ni.
Lunglei Police-te chuan chhuizui nghalin, an mobile phone a la ring thei a, chuta tang chuan chhuizelin Saizakawn leh Hauruang inkar, Riangvaite Thlanmual bul kawngthlangah i10 car MZ 02A – 5769 chesual an hmu ta a ni. Ruang pathum an hmu tel.
Ruang pahnihte chu K Lalhlimpuia (25) leh Jerry Lalnunfela (40), Hauruang ve ve an ni tih finfiah a ni tawh. He thuziahlai hian hmeichhia hi tunge a nih finfiah a la ni lo. Ruangte hi lak chhuah tum mek a ni.
