May 10, 2026
Sunday
Tukin (10.5.2026) khan Serkawr leh Kawlchaw inkarah tipper MZ/07 A – 1792 chu a chesuala, mi pahnihin nunna an chan.
Lawngtlai atanga thudawn danin, Tiau atanga lirthei khalha eizawnga Lawngtlaia inluah Laltlanhlua (24) s/o Rualkhuma leh 2nd driver C Zomuanpuia (37) s/o C Laldinpuia, Lawngtlai Bazar Vengte chu tukin zing khan Myanmar-ah bungraw dah turin Lawngtlai pelh deuh petrol pump atangin an chhuak a ni.
An hnunga tlante’n Serkawr leh Kawlchaw inkarah an chesual tih hi an hria, Lawngtlai lam an hriattir nghal. An chetsual hun hi zing dar 7 vela ngaih a ni a, kawngthlangah an tlanliam a ni. Chetsualna hmunah hian Laltlanhlua leh C Zomuanpuia hi an thi ve ve.
Chawhnu dar 1:30 vel khan an ruang hi Lawngtlai thlenpui niin, postmortem turin damdawi inah lak nghal a ni. C Zomuanpuia hi zaninah vui a ni dawn a, Laltlanhlua ruang chu an khua panpui a ni ang.
