News

Vawiin (20.4.2026) hian Indian Oil Cooperation Ltd. (IOCL) chuan Press Information Bureau (PIB) leh Directorate of Information and Public Relations (DIPR)-te nen tangrualin I&PR Auditorium-ah thuthar thehdarhtute an kawm a, tunlaia eirawngbawlna gas (LPG) kaihhnawiha mipui vantlang hriattur pawimawh chi hrang hrangte an sawifiah.

IOCL hotute chuan West Asia-a indona vanga khawvel hmun hrang hranga LPG vang leh harsa anga sawi chuan Mizoramah engmah nghawng a nei lo tih chiang takin mipuiten hria se an duh tih sawiin, chutih rualin gas chah dan phung felfai zawk kalpui a nih theih nan te, gas bo thlau a awm lohna turte leh gas-in a neitu dik tak hnen a hun taka a thlen theihna tur tea hmalakna avangin mipuite chu chiai mai lo turin an ngen nghal.

Tun dinhmunah Mizoramah hian chhungkaw 29,7000 hnenah nitin gas bur 8,000 chuang chatlak loin an pe chhuak reng tih sawiin IOCL hotute chuan, “Hei hi indo hma pawha thil awmdan reng a ni,” tiin ipuite chu uar leh zuala SMS leh IVRS hmanga digital booking hmang tura sawmin, Delivery Authentication Code (DAC) chu tun hma lam zawng aiin a pawimawh leh zual tawhin, hemi tel lo chuan gas bur khat mah pek chhuah theih a nih tawh meuh loh thu an sawi.

IOCL hotute chuan Mizoram Sawrkar nen tanrualnain, state pumah black marketting leh hoarding-te dap chhuaka a tul anga hma la tur pawl hrang hrang pawh din an nih thu an sawi a, LPG sem chhuaktute leh sem chhuah a nihdan mumal taka chhinchhiahna pawh kalpui zel a ni tih tarlangin, mipuite chu chiaina tur engmah a awm lo tih hre reng turin an chah. Gas bur lo chhek khawl chiam emaw distributor-te tana phurrit siamsak zawng emaw a awm lo hram turin mipuite chu an ngen bawk a ni.