Mar 17, 2026
Tuesday
Food Civil Supply & Consumer Affairs (FCS&CA) Department chuan thuchhuah siamin, tunlai khawvel geo politics boruak avangin mipuiten eirawngbawlna gas-ah harsatna an tawh loh nan India Sawrkar chuan theihtawpin hma a la reng tih tarlangin, “State Sawrkar pawhin mipuiten harsatna an tawh loh nan chak takin hma a la reng a ni,” an ti.
Tun dinhmunah nitina Mizoram mipuite mamawh zat LPG chu bur 7,900 vel a nih thu tarlangin FCS&CA Dept. chuan, “LPG Distributor hrang hrangah harsatna lian tham awm lovin LPG a thleng mek zel. Tin, Mizoramin LPG kan lak luhna, IOCL Bottling Plant, Borkhola-ah pawh harsatna awm loin kan state mamawh ang tawk lak zel a la ni,” tiin India Sawrkarin mipuiten tul loa LPG bur an chhekkhawl loh nan LPG booking tih hnuhnun ber atanga booking tih leh theih hun inkar chu ni 25-ah a rawn bituk thar thu an tarlang.
FCS&CA Dept. chuan hetiang boruak kaihhnawihah hian mi duham thenkhatin tul loa LPG bur an chhekkhawl leh, man to zawka dan lova an hralh chhawn loh nana hma la turin vawiin (17.03.2026) hian Sawrkarin State Level leh District Level Monitoring Cell a din thar tih tarlangin, “He Cell hian mipuiten an chanvo dik tak leh a mamawh tak tak ten LPG bur an dawn theih nan hma a la dawn a ni. Hetianga chak taka State Sawrkarin hma a lak avang hian mipuite chiai lo tur leh, tul loa LPG chhekkhawl lo turin sawrkarin mipuite a ngen tak meuh meuh a, LPG pawh renchem taka hmang turin mipuite a ngen bawk a ni,” an ti.
