News

Land Revenue & Settlement (LR&S) Department chuan vawiin (26.6.2026) hian Folkland Park Conference Room-ah State Level Review Meeting an nei a, an department hmalak meknate leh hmathlir bakah an hnathawh kawnga harsatna hrang hrangte sutkian dan tur an sawiho.

LR&S Minister B Lalchhanzova chuan thu sawiin, “Kum hnih leh a chanve chauh kan thawh ho chhungin thawktute tanrualna avangin mipui pawhin thil tha tih tum leh hmasawn tum hmuhin LR&S department min hmuin ka hria a, lawmawm ka ti hle.LR&S Dept laka mipuiin rinna an nghaha, rinngam an nihna lantir turin hma ka hruai a, keima pualin ram khawi hmunah mah ka la inpe lo,” tiin a thawhpuite chu a hnung zui ngam turin a fuih.

Department hmalakna tih chak zel dan tur te, siamthatna hna kalpui mek ennawnna te leh kalphung siam that la tul awm te bakah mipui rawngbawlna kawnga district hrang hrangte harsatna tawhte ngaihthlak leh sawihona hun siam a ni chu lawmawm a tih thu sawiin B Lalchhanzova chuan, State Level Review Meeting hi kumtin neih thin tur a nih thu a sawi.

LR&S Minister chuan Revenue Department chu Mizoramin ama puala sum a hmuh theihna (state own revenue source) pawimawh tak a nih thu sawiin, “Mipuite pawhin Mizoramin ama puala sum a thawhchhuah pawimawhna an hrethiam chho zel. Kum kalta khan Stamps & Registration bakah Land Tax leh Non Tax atanga Department sum lakluh cheng vaibelchhe 40.23 a tling chho ta mek. A pung chho tha hle a, heng sum te hi Mizoram Sawrkar ta liau liau, state mamawha hman tur a ni,” a ti.

Review Meeting hi LR&S Secretary Vanlalmawia huan a kaihruai a, administrative department bakah directorate leh fistrict tin assistant commissioner-te hnen atangin presentation ngaihthlak a ni.