Lungawi lohna lantir zel

Mizoram Govt. Adhoc-Aided High School Teachers’ Association (MIGAHTA) tarlan danin, school
provincialised an nih tawhna dinhmuna dah let leh an phutna leh dinhmun hniam zawka dah duh lohna entira sorkar laka kan lungawi lohna chu ‘mass casual Leave’ lain, vawiin (28.07.2026) hian an chhun zawm leh.

An tarlan danin,
adhoc high school-te hi adhoc status-a kum 15 kan awm hnuah, kum 2023-ah sorkarin an provincialised vek tawh a, govt. signboard leh seal pawh an siam tir vek.

Nimahsela thla 9 hnuah revoke leh vek an ni a, revoke an nih hnu hian provincialised leh vek an nih tur thu Minister tawngka vawi tam tak an dawng a ni.

Amaherawhchu, revoke an nih atanga kum 2 a liam hnuah kum 20 kaltaa an awm tawhna leh an kalsan tawh dinhmun, lumpsum-grant-in aid dinhmunah dah an nih lehna tur rules sorkarin a chhuah leh ta a ni.

Hetianga provincialised an nih tawhna hlih sak an nih mai bakah an school dinhmun a hma aia hniam zawka dah a ni hi pawi an ti takzet tih an tarlang.

Hetianga school dinhmun dah
hniam a nih avang hian tuna thawk mekte ran retire hunah an aiawh tur zirtirtu chu hlawh tlemte hmanga lak an ni tawh tur zirtirtu dinhmun dahhniamnaah an ngai tih tarlangin MIGAHTA chuan, “Thalai lehkhathiam, hna zawng mekte beidawnna siamtu a ni tur hi kan duh lova, kan dodal zel dawn a ni,” an ti.

MIGAHTA chuan an lungawi lohna leh leh duhna lantir nan hian kar hmasa July 21 & 22 khan badge dum an lo bel tawh a, July 23 & 24 khan No Teaching Day hmangin sorkara an duhna an lo lantir tawh bawk.

Nimin July 27 & 28 hian Mizoram puma adhoc high school 90 chuanga thawktute te chuan mass casual lain school hi an khar vek bawk. Naktuk lamah hian lungawi lohna leh sorkara an duhnate lantir nan Vanapa Hall kawtah peaceful sit-in demonstration neih an tum.

Sorkara an dilna leh ngennaten awmzia a neih loh chuan na zawka hmalak chhunzawm zel tum a ni.

MIGAHTA member-ten sorkara an thilphut a hlawhtlin theih nana lungawi lohna kan lantir avang hian khaw hrang hrang 90 chuanga high dchool-ahte zirna a khaihlak hi
pawi an ti takzet tih tarlangin, “Amaherawhchu, heng kan hmalaknate hi khawtlang school
dinhmun tlahniam tur venna leh thangthar hna zawng mekte hmakhua a ni tih min hriat sak turin kan ngen a ni,” an ti.