Lungleia State University dah duhtuten kohhran hruaitute an kawm

Mizoram State University Demand Committee Lunglei chuan vawiin (3.11.2025) khan Mizoram Baptist Kohhran hruaitute leh UPC NEI District Hqrs., Lunglei hruaitute an kawm a, Lungleiah State University din a nih theih dan tur chungchang an sawipui.

State University Demand Committee in BCM Hqrs Office-an tlawhnaah hian Rev Dr H. Lalthlamuana General Secretary leh Rev R. Lalrintluanga AGS Mission-ten lo dawngsawngin demand committee hruaitute chuan state university chungchanga hma an lo lak tawhna leh an hmachhawp hrang hrangte an sawi.

MZP leh MSU-ten Assembly House-a Mizoram State University Bill pawm a nih hma atang tawh leh bill pawm a nih hnua Higher and Technical Education Minister hmu a, state university chu Lungleia dah tura an lo ngen tawh thin thute sawiin State University din tur chungchang chu an phak tawka an zirchiannaah Lungleiah a din theih ngei a ni tih an hriat thu an sawi.

Chhim lam, Siaha, Lawngtlai leh Hnahthial District zirlaite tan Lungleiah state university din tul an tih thu sawiin, Mizoram Baptist Kohhran hruaitute chu an hmalakna thlawp turin an ngen a ni.

Mizoram Baptist Kohhran hruaitute pawhin state university Lungleia din chungchang chu an phak ang tawk a, an vei thin thu leh an titi tam ber a nih thu Mizoram State University Demand Committee hruaitute an hrilh.

Politics rawngkai lo a nih chuan thil tha chu an duh thu sawiin Mizoram Baptist Kohhran hruaitute chuan, ‘Kohhran pawhin sum a sen tamna ber chu zirna kawngah a ni,’ tiin demand committee thu leh hlate sorkarin a ngaih pawimawh ngei theih nana hmalak tha an tih thu an sawi.

BCM hruaitute chuan chutihrual chuan kohhran an nih anga an tih tur leh tih loh tur chin a awm thu sawiin state university chungchang chu party infuihpawrhna emaw politics thil a nih loh thu leh Mizoram State University Demand Committee hmalakna chu an tih chin mawiah an thlawp zel dawn thu an sawi.

Mizoram State University Demand Committee hian UPC NEI District Hqrs Lunglei Office pawh tlawhin Superintendent Rev C. Lalrintluanga, Treasurer Rev K Vanlalhruaia leh Secretary PC Lalfakawmaten an lo dawng sawng.

State University Demand Committee din a nih chhoh dan leh an hmachhawp hrang hrangte sawiin, state university chu chhim lam hmasawn nana thil pawimawh tak a nih thu leh zirlai tam zawkten college bak rap pha lo a zirna an chawlhsan thin avangin an kawtkaiah ngei master degree an zir ve theih nana hmalak a tul thu an sawi a, UPC NEI kohhran chu an hmalakna thlawp turin an sawm a ni.

UPC NEI District Hqrs Lunglei hruaitute chuan kawng hrang hranga chhim lam hmasawnna tur chu an thil vei berte zinga pakhat a nih thu an sawi a, Demand Committee hmalakna chu tha an tih thu leh an thlawp thu sawiin Kohhran thalaiten state university chiang lehzual an hriat fiah theih nan, a tul dan anga awereness programme siam te pawh thaa an hriat thu an sawi a ni.

State University Demand Committee chuan Lungleia kohhran hrang hrang hruaitute pawh kawm chhunzawm zel an tum. State University Demand Committee hruaitute hi Chhimbial Chhantu President Rev F. Sangvela’n a tawiawm a ni.