Mana Motors-in an tlangzarh

Mana Motors chuan Mahindra Bolero Camper thar an tlangzarh rualin an duhthusam anga siam chhuah a nih thu an sawi a, pahnih an hralh chhuak nghal.

Vawiin (29.1.2026) chhun khan Mana Motors hian an showroom, Bawngkawnah Bolero Camper thar hi an khuh hawng a, Mizorama Mahindra full range dealer Mana Motors neitupa Dr Franklin Lalrinngheta chuan, “Kan lo suangtuah thin anga thain Camper thar an rawn siam chhuak a, air conditioner (AC) leh four-wheel drive a awm kawp tawh a ni,” a ti.

Bolero Camper chhuak hmasaah four-wheel drive awm tho mah se, AC a awm tel lo a, AC awmna lah four-wheel a ni lo bawk a ni.

Tlangzarhnaah pahnih an hralh bakah hauh lawk mi 30 an awm a, Mizoram dealer atangin Rs 10,51,815; Rs 10,67,445; Rs 10,91,318; Rs 10,98,731 leh Rs 11,04,026-in a lei chhuah theih.

Mana Motors dealer principal Dr Marina chuan, “Camper hi Mizorama hriat lar, bungraw phurleh mihring phur thei a ni a. Company dangin nei ve tho mah se Mahindra Camper man a tlawm bik hle a, chhungkaw lirthei atana hman theih leh thil phur hlawk tak a ni a, a leitute tangkaia an hman theih nan leh tluang taka hmang ngei turin duhsakna ka hlan a ni,” a ti.

Camper tharah hian a hmaa mi an duhkhawp lo lai rawn thuam thain changkang zawkin an duang a; AC four-wheel drive-ah engine M2DiCR, 4 cylinder, 2523 cm hmangin 59.7 kw leh 220 Nm torque a pe chhuak thei a. Fuel litre 57 lengin a hnungah mi pali aia tam a chuan theih.

India ramah sumdawnna atana hman chi lirthei laihawl (light goods vehicle)-ah Mahindra a chungnung a, 2025 atanga January 2026 thlengin hralh chhuah 65.2 a hauh phak.

Mana Motors-in thla liam ta December 2025 khan lirthei 217 hralhin thla khat chhunga an hralh chhuah tam ber an hmang zo chiah. Mi mal hman chi (passenger car) 118 hralhin thla khata an hralh hnem ber a ni a, sumdawnna atana hman chi erawh 99 telin an hralh chhuah dan tlanglawn a ni ve thung a, Camper thar hian an hralh chhuah a tihpun ngei an beisei.