News

Vawiin (4.11.2025) chhun khan Mara Students Organisation (MSO) te chuan an kum 60-na champha (diamond jubilee) Siahaah an lawm a, an hun hmanpuitu Chief Minister Lalduhoma chuan Marate chu
Zo hnahthlak dik tak an nih thu leh kan ramin hma a sawn chhoh zel thu a sawi.

Marate chu Zo hnahthlak an nihzia sawiin Lalduhoma chuan, Prof. Federic K. Lehman, Illinois University pawhin a lehkhabu ‘The Structure of Chin Society – 1963-ah, Lushai leh Lakherte hi thlah khat, chuahna thuhmun an ni a, hming hran inphuah mah se Chin ve ve an ni’ tiin a lo sawi tawh thu a sawi a, ‘Mara te hi Zo hnahthlak dik tak, Zohnahthlak dangte ang bawk a Chhura thawnthu nei, Lusei tawng nena tawngkam thuhmun leh sawi dan inang tam tak nei a ni,’ a ti.

Chief Minister chuan kan ramin hmasawnna a hmu chho zel a, hmachhawp tam tak an nei tih sawiin, ‘Heng hmasawnna tharte chhawr tangkaitu ni tur hian kan thalaite lo inbuatsaih sauh sauh ang che u. Tun hnaia zirchiangtu pakhat chuan Mizoram chu India rama eirukna tlemna ber pahnihna a nih thu an sawi a, a chhinchhiahtlak hle. Corruption leh rukrukna lam reng reng min dopui turin kan thalaite ka sawm che u a ni. Eiruk sum atanga lei, thil reng reng hi chu duh lo ngam ila, kan nu leh paten an eiruk atanga an lei a nih chuan eng anga thil tha pawh ni se, i hnawl ngam ang u,’ tiin Mara zirlaite a chah.

Mara Students Organization hi November 4, 1965 khan Shillong khawpuiah din a ni a, tunah hian an president chu Elson Eliasah Notlia a ni.