Mass casual leave la dawn

Mizoram Sorkar hnathawk New Pension Scheme (NPS) hmangtute chuan Old Pension Scheme (OPS) hman phutin ni 8.6.2026 (Thawhtanni) khian a huhoin chawlh an la dawn (mass casual leave)

Mizoram Movement for Old Pension Scheme (MIMOPS) chuan, Sorkar Laipuiin kum 2004-a NPS a hman hnuah Mizoram Sorkar pawhin kum 2010-ah a hmang tan tih tarlangin, “Sorkar Laipui chuan NPS hi tum eng emaw zat ennawn tawhin, tunah hian NPS aiah Unified Pension System (UPS) a hmang leh tawh. Mizoramah erawh chuan kum 2010 atangin NPS thlakna emaw, ennawnna emaw pakhatmah a la awm lo. Sorkar Laipui hnuaia thawk leh Mizoram Sorkar hnuaia thawkte kan dinhmun a inthlau tawh hle,” an ti.

MIMOPS chuan, OPS hman an phut chungchangah Mizoram Sorkarin October 27, 2023 NPS Study Committee a din tih tarlangin, “NPS Study Committee zirchianna atanga rawtna an thehluh chu kum 1 liam hnuah pawh thutlukna mumal tak emaw, kal zel dan tur emaw siam a la ni lo a, pawi kan ti hle,” tiin Thawhtanni-a mass casual leave an kalpui tur chu sorkar dodalna a ni lova, pension tha lo, NPS thlak ngiatna a nih angin nghawng tha tak nei se an duh tih an tarlang.