Feb 22, 2026
Sunday
Lunglei Police hnuaia DSB staff-te leh Assam Rifle, Lunglawn te chuan tukin (22.2.2026) dar 4 vel khan joint operation an nei a, Aizawl – Champhai maxi cab service atangin heroin eng emaw zat an man.
DSB staff leh AR-te hian Aizawl – Champhai maxi cab service MZ/01 N – 3822, Lalhmangaihzuala (34), Champhai Dinthar Veng khalh chu ringhlelin an lo tiding a ni. Maxi cab-ah hian hmeichhe pathum Laltanpuii (24), Champhai Zotlang; Lalthanpuii (38), Lunglei Farm Veng leh Ruthi Sangziki (42), Lunglei Ramtharte an chuang.
Hmeichhe pathumte hian heroin an tawlh nia rinhlelh a nih avangin dan anga tihfel ngaite tihfel a nih hnuah, thuhretute hmuh laiin maxi cab hi endik a ni a, sahbawn bawma dah heroin grams 94.42, cheng nuai 18.88 man hua chhut chu hmu chhuakin an man nghal. Hmeichhe pathumte leh maxi cab khalhtute pawh hi man nghal an ni a, dan anga hmalak chhunzawm a ni ang.
