MCS-a pahnihnin, a nu enkawl pahin a inzir thin

MPSC-in MCS (Combined Competitive) result a tih chhuah taka pahnihna Jammy Vanhmingliana (26) s/o R Vanlawmkima, Ramthar Veng, Aizawl hian a nu avangin a hna a lo ban san tawh.

Jammy Vanhmingliana hian HSLC chu first division-ah pass-in, HSSLC-ah chuan top ten-ah a lang. Bacherlor chu Christ University, Bangalore atangin a zo. Bachelor a zawh hnu hian company lamah hna a hmuh nghal avangin master a zir chhunzawm lo.

A tuina tak company-ah a thawh avangin hna dang pawh a melh lutuk lo. Mah se, beisei lawk hauh loin a nu chu damlohnain a tlabuak a ni. Jammy-a chuan a nu enkawl turin a hna tha tak mai chu ban sanin, Aizawlah a rawn haw.

A hna a ban san tak avangin civil service lamin a rilru luah mah se, coaching academy-ah pawh a kal thei lo. Mah se, UPSC online coaching erawh a nu enkawl pahin in lam atangin a zawm thin.

A nuin chatuan ram a pan san tak hnuah hna zawngin ngawrh zawkin hma a la a, tunah hian Assembly Secretariat-ah translator hna a thawk mek a ni.

Theihtawpin inbuatsaih ve mah se, pahnihna dinhmun chu a hauh phak a beisei loh thu Jammy-a hian Bengvarna a hrilh.

Jammy-a hi Salvation Army niin, a theih leh phak ang tawkin an kohhran thalaiah a inhmang a, exam a hmachhawn dawn hnaiah erawh a inhmang ngai lo. Lam lama tui tak a nih avangin inkhawmpui dawnahte an kohhran thalai lam zirtir tuah a tang thin.