News

Vawiin (14.5.2025) chhun khan Education Minister Dr. Vanlalthlana hoin School Education Conference Hall, Lungleiah zirlaite’n minister hmu a, an duh zawng an zawh a, an sawipui theihna, ‘Meet Your Minister’ hun buatsaih a ni a, Lunglei khawpui chhunga zirna in 14 aṭangin zirtirtute leh zirlaite an tel.

Education Minister chuan ‘Meet Your Minister’ hun a ṭum 4-na atana buatsaih theih a ni leh ta chu lawmawm a tih thu sawiin, zirlaite zinga hun hman chu nuam a tih thu a sawi a, “Eng anga lehkhathiam leh nihna sang nei pawh mi dang tana malsawmna an nih loh chuan eng mah an ni lo a, mi dangte tana luang chhuak tam apiangin ngaih hlut an hlawh,” tiin khawtlang tan leh mi dangte tana luang chhuak ṭhin turin zirlaite a fuih.

An laka hmuh let leh tur beisei kan neih lohnate chunga kan chet danin mihring nihna dik tak a tar lang tih sawiin Dr. Vanlalthlana chuan, zirlaite chu mite chunga ṭawngka leh chet ziaa ṭhat chhuah tlat turin a fuih a, “In hma hunah duhthlanna siamna tur tam tak in la hmachhawn dawn. Duhthlanna dik siam thei turin tawn hriat nei tawhte rawnin, inchhiar zauin, inzir peih rawh u,” a ti.

Zirlaite chuan Education Minister Dr Vanlalthlana chu Mizoram Sawrkar hmalakna leh zirna kaihhnawiha an hriat duh hrang hrangte zawtin, an zawhnate chu a chhang zel a ni. Sawihona hun an hmang nghal. Minister hian lehkhabu pahnih – “Zirna Lamtluang: Road Map to Higher Education” leh “Nung Ngam Tura Huaisenna” chu sikul telte hnenah a hlan vek.