Mar 25, 2026
Wednesday
Khankawn Check Gate-a duty Champhai Police Team-te chuan ni 22.3.2026 zan dar 7 vel khan Zokhawthar atanga Aizawl lam pana tlan scorpio MZ/01 K – 0354, Vanthangliana (40), New Champhai khalh atangin methamphetamine ni ngeia hriat thahnem tak an man.
Champhai Police-te chuan scorpio hi ringhlelin an lo tiding a, an endik laiin a motor a chiankuan loh thu sawiin, Champhai lam panin a tlan thut a ni. Police-te chuan umzui nghalin, TT road, Mizofed Pump bulah motor hi an nangching a, Vanthangliana erawh ramhnuai lamah a tlan chhia.
Motor hi Khankawn Check Gate-ah khalh phei niin thuhretu mi pangate hmuh laiin endik a ni. Motor chhungah hian methamphetamine ni ngeia hriat kgs. 5.947, cheng vbc. 4.75 man hua chhut hmu chhuakin, an man.
Champhai Police-te chuan Vanthangliana zawn hna hi thawk chhunzawmin, theihtawp an chhuah a, zan dar 11 velah an man thei. Champhai Police Station-ah hruai niin, thubuai siam sak a ni. A kaihhnawih dang awm theite an chhuizui mek.
