Mi thenkhatten MUHCS sawi hnawm an tum &#8211; Lalrinpuii

Vawiin (16.4.2026) chhun khan ZPM Ṭhalai buaitsaihin AMC Ward XIX street campaign neih a ni a, he hunah hian Health Minister Lalrinpuii chuan Mizoram Universal Health Care Scheme (MUHCS) chungchang a sawi.

Health Minister mipui healthcare an tih mai MUHCS chu mi ṭhenkhatten sawi hnawm an tum hle tih sawiin, “AB-PMJAY (golden card) kan tih hi sorkar damdawi inah chauh a hman theih a, state pawnah phei chuan golden card hmang hian an refer ngai lo a ni. ZPM Sorkarah chuan golden card leh MUHCS-te convergence-in sorkar damdawi inah kher lo pawh MUHCS hman theihna damdawi inah chuan golden card pawh kan hman ve theih phah ta a ni,” a ti.

Central Sorkar atangin golden card atan cheng vbc. 20.50 pek an nih thu sawiin Lalrinpuii chuan, “MUHCS leh golden card kan suih zawm tak avangin cheng vbc. 50.82 golden card atan state sorkarin kan seng tawh a ni. Hriselna lama hmasawn turin ZPM Sorkar chuan theih tawp tak meuh meuh a chhuah a, Ward XIX bialah pawh hmasawnna lian tham tak a kal mek a, a vaia sawi a remchang rih lo,” tiin sorkar hmalak mekna a hlawhtlin zel theihnan Ward XIX mipuite thawhpuina a ngen.